Azərbaycan, Bakı, 15 noyabr /Trend, müxbir İ.İzzət/
Gecə vaxtı Azərbaycanda sərnişin avtobuslarının hərəkəti məhdudlaşdırılıb ki, bu da yol qəzalarının sayının azalmasına səbəb olub. Trend-in məlumatına görə, bunu Baş prokuror Zakir Qaralov Azərbaycan Respublikası Ali Məhkəməsinin bu gün keçirilən Plenumunda çıxışı zamanı deyib.
Z.Qaralovun sözlərinə görə, ictimai nəqliyyat vasitəsini idarə edən şəxs sərxoş olmamalıdır: "Bunlara nəzarət təkmilləşdirilmiş formada olmalıdır. Biz Baş nazirə müraciət etmişik ki, magistral yollarda daş, çınqıl ağırtonnajlı maşınlarla deyil, dəmir yolu ilə daşınsın ki, bu əlavə qəzalara gətirib çıxarmasın.
Baş prokuror, həmçinin qeyd edib ki, yol qəzaları ilə əlaqədar tibbi-ekspertiza rəyinin vaxtında verilməsi işlərinin təkmilləşdirilməsinə dair təkliflər verilməlidir: "Bu sahədə ciddi təkmilləşdirməyə ehtiyac var. Biz bu sahədə mübarizəni gücləndirəcəyik".