Bakı. Samir Əli - Trend:
Ötən gün Bakının Qaradağ rayonu ərazisində yük maşını ilə marşrut avtobusunun toqquşması nəticəsində xəsarət alanlardan daha bir nəfər evə buraxılıb.
Bu barədə Trend-ə açıqlamasında Kliniki Tibbi Mərkəzin baş həkimi Ədalət Dadaşov bildirib.
Baş həkim qeyd edib ki, hazırda mərkəzdə 5 nəfərin müalicəsi davam etdirilir: "Dünən həmin qəza ilə bağlı Kliniki Tibbi Mərkəzə 21 nəfər müraciət edib. Onlardan 16 nəfərinə ilkin tibbi yardım göstəriləndən sonra evə buraxılıblar. 6 nəfər isə stasionara qəbul edildi. Dünən axşam saatlarında daha bir xəstənin səhhəti normallaşdığından ambulator müalicəyə yazılıb. Hazırda xəstəxanada 5 nəfər qalıb. Onlardan 3 nəfər beyin travması ilə, iki nəfər isə əzilmiş yaralar ilə qəbul olunub. Xəstəxanada qalanlardan biri hamilə qadındır".
Ə.Dadaşov bildirib ki, hazırda stasionarda olan xəstələrin səhhətlərində ciddi problem yoxdur, vəziyyətləri sabitdir.
Xatırladaq ki, iyulun 12-də səhər saatlarında Bakı-Qazax-Gürcüstan sərhədi avtomobil yolunda ağır yol qəzası baş verib.