Bakı. İlhamə İsabalayeva - Trend:
Əlilləri aparmamalarına baxmayaraq, 2020-ci ildə öz təkidimlə müharibəyə getdim.
Bunu Trend-ə ehtiyatda olan polkovnik leytenant, “Vətən müharibəsi iştirakçisi” və “Hərbi Xidmətdə Fərqləndiyinə görə” medalları ilə təltif olunan II qrup Qarabağ əlili Elmar Hüseynov deyib.
Onun sözlərinə görə, 2008-ci ildə Tərtər istiqamətində gedən döyüşlərdə düşmənə ağır itki verib, bu döyüşlərdə qəlpə yarası alıb. 2014-cü ildə Gədəbəy istiqamətində hərbi vəzifələri yerinə yetirərkən kəllə-beyin travması alıb:
"Kəllə-beyin travması almışam, başımdakı qəlpə çıxarılmayıb. 2017-ci ildə xəstəliklə əlaqədar ehtiyata buraxıldım. Oktyabrın 20-nə qədər Cəbrayılın Daşkəsən, Seyidlər kəndi, Ağdərə, Talış Suqovuşan istiqmatlərində, Hadrutun alınması istiqmaətlərində gedən döyüşlərdə artilleriya qoşunlarının tərkibində könüllü fəaliyyət göstərmişəm. Oktyabrın 20-də Müdafiə Nazirliyinin əmri ilə N saylı hərbi hissədə artilleriya rəisi vəzifəsində çalışdım. O istiqamətlərdə düşmənə artilleriya zərbələri ilə ağır itkilər vermişik".
E.Hüseynov bildirib ki, 2020-ci ildə dekabrın 31-də hərbi xidmətdən tərxis olunub:
"Ayağımda aşıq sümüyünün nekrozu var. Sumqayıt Reabilitasiya Mərkəzinə gələndə ayağımı yerə ata bilmirdim, müalicə olundum, indi vəziyyətim yaxşıdır. Səhhətimdəki problemlərə baxmayaraq, Vətənim Azərbaycan üçün yenə də müharibəyə getməyə hazıram".
