Bakı. Trend:
Azərbaycanda bütün xəstəliklər icbari tibbi sığorta ilə əhatə
olunmalıdır. Xüsusilə icbari tibbi sığorta yüksək ölüm göstəricisi
olan xəstəliklərin müalicəsinə yönəlməlidir.
Trend-in məlumatına görə, bunu Milli Məclisin Səhiyyə komitəsinin
sədri Əhliman Əmiraslanov Milli Məclisin İqtisadi siyasət, sənaye
və sahibkarlıq komitəsinin iclasında deyib.
O qeyd edib ki, ola bilər ki, bu gün İcbari Tibbi Sığorta üzrə
Dövlət Agentliyinin maliyyə vəsaiti bütün xəstəlikləri əhatə etməyə
imkan verməsin, ancaq zamanla vəsaitlər artacaq və dövlət
büdcəsindən, digər mənbələrdən vəsaitlər daxil olacaq.
“Bu gün minlərlə insan orqan transplantasiyası gözləyir. Biz bununla bağlı qanun qəbul etdik, bu istiqamətdə işlər davam edir. 1700-dən artıq xəstə böyrək transplantasiyası gözləyir”, - deyə Ə.Əmiraslanov əlavə edib.