Bakı. Trend:
Milli Gimnastika Arenasında Bakı Dövlət Universitetinin (BDU) Məzun Günü keçirilib.
Trend-in məlumatına görə, tədbirdə əvvvəlcə Dövlət himni səsləndirilib, şəhidlərin əziz xatirəsi anılıb.
Mərasimi giriş sözü ilə açan BDU-nun rektoru Elçin Babayev məzunları təbrik edib, onlara uğurlar arzulayıb: "Bu gündən etibarən qarşınızda yeni üfüqlər açılır. Siz şanlı tariximizin qızıl hərflərlə yazıldığı bir dövrdə məzun olursunuz. Fəxr edirik ki, işğaldan azad edilmiş doğma torpaqlarımızda üçrəngli Zəfər bayrağını ucaldanlar sırasında universitetimizin tələbə və məzunları, sizin həmyaşıdlarınız da var. 44 günlük Vətən müharibəsində gənclərimizin canı və qanı hesabına əldə edilmiş Qələbəyə Bakı Dövlət Universitetinin 200-ə yaxın məzun və tələbəsi imza atıb, onlardan 19 nəfəri şəhidlik zirvəsinə yüksəlib”.
Rektor vurğulayıb ki, BDU fəaliyyət göstərdiyi dövr ərzində 200
min nəfərədək mütəxəssis və yüksəkixtisaslı kadr yetişdirib. 103 il
bundan əvvəl 2 fakültə, 44 nəfərlik professor-müəllim heyəti və
1094 tələbə ilə fəaliyyətə başlayan Universitetdə hazırda 16
fakültə, 120 kafedrada ali təhsilin bütün səviyyələrində 25 minə
yaxın tələbə təhsil alır, 3 minə qədər əməkdaş, o cümlədən 1500
nəfərə qədər professor-müəllim heyəti və elmi işçi çalışır.
Sonra Universitet tələbələrinin ifasında BDU-nun himni
səsləndirilib.
Məzunları təbrik edən təhsil naziri Emin Əmrullayev bildirib ki,
BDU Azərbaycan təhsil tarixinin ən vacib flaqmanıdır: “BDU yalnız
burda oxuyanların deyil, hər bir azərbaycanlının universitetidir.
Çünki Azərbaycanın ali təhsil tarixi məhz bu universitetlə
başlayır. Siz bu ali təhsil ocağında elm, biliklə yanaşı, əsl
vətəndaş, ləyaqətli və dürüst insan kimi vacib olan dəyərlərə
yiyələnmisiniz. Siz Zəfər çalmış xalqın gənclərisiniz, “Şuşa
ili”ndə məzun olursunuz. İşğaldan azad edilmiş torpaqlarımızda hər
sahə üzrə yüksək ixtisaslı kadrlara böyük ehtiyac var. Əminəm ki,
BDU məzunlarının bir hissəsinin əmək fəaliyyəti məhz həmin
torpaqlarla bağlı olacaq. Hər birinizə doğma Azərbaycanımıza
layiqli vətəndaş olmağı arzu edirəm”.
Gənclər və idman naziri Fərid Qayıbov əsası Ümummilli lider Heydər
Əliyev tərəfindən qoyulmuş, Prezident İlham Əliyev tərəfindən
uğurla davam etdirilən dövlət gənclər siyasətinin əhəmiyyətindən
bəhs edib. O, BDU-nun Azərbaycanın inkişafına mühüm töhfələr
verdiyini deyib, Ulu öndər Heydər Əliyevin bu ali məktəbin məzunu
olduğunu qürur hissi ilə xatırladıb.
Daha sonra BDU haqqında videoçarx nümayiş etdirilib, Ümumi Orta Müvəffəqiyyət Göstəricisi (ÜOMG) yüksək olan və xüsusi fəallığı ilə seçilən 33 məzuna sertifikat və hədiyyələr təqdim ediblər.
Tədbir konsert proqramı ilə davam edib.
