Bakı. Trend:
Mayın 8-də Bakıda Dövlət Turizm Agentliyi, UNESCO yanında Abidələr və Tarixi Yerlər üzrə Beynəlxalq Şuranın (ICOMOS) və İCOMOS Azərbaycan Milli Komitəsinin birgə təşkilatçılığı ilə “Ümumdünya irsi peşəkarlarının bacarıqlarının gücləndirilməsi” adlı beynəlxalq təlim proqramının açılış mərasimi keçirilib.
Trend-in məlumatına görə, açılışda çıxış edən Dövlət Turizm Agentliyi sədrinin müavini Azadə Hüseynova yer üzündə ən əhəmiyyətli mədəni məkanlar olan dünya irs ərazilərinin mühafizəsi və idarə olunmasının xüsusi bacarıqlar tələb etdiyini bildirib: “Bu sahədə bacarıq və biliklərin gücləndirilməsi dünya mədəni irsinin qorunması baxımından böyük önəm kəsb edir. Odur ki, bu təlim proqramı ümumdünya irs obyektlərinin mühafizəsi sahəsində bacarıqları artırmaq, bir-birimizdən öyrənmək, təcrübə mübadiləsi aparmaq üçün unikal imkan yaradır. Dövlət Turizm Agentliyi olaraq bu təşəbbüsün bir hissəsi olmaq , regionda ümumdünya irs üzrə peşəkarların potensialının gücləndirilməsinə töhfə verməkdən çox şadıq”.
İçərişəhər Dövlət Tarix-Memarlıq Qoruğu İdarəsinin İdarə Heyətinin sədri Şahin Seyidzadə Azərbaycanda bu səviyyəli tədbirin təşkilinin dünya irs ərazilərinin mühafizəsi, mədəni irs obyektlərinin bərpası və konservasiyası sahəsində ekspertlərin praktiki biliklərinin artırılması baxımından böyük önəm daşıdığını bildirib.
Sonra ICOMOS Prezidenti Teresa Patricionun görüş iştirakçılarına video müraciəti təqdim olunub. Dünyada tarixi-mədəni abidələrin müxtəlif səbəblərdən zərər gördüyünü və dağıldığını qeyd edən ICOMOS prezidenti onların effektiv mühafizəsinin təşkili və konservasiyasının aparılması üçün peşəkarlara ehtiyac olduğunu bildirib. Teresa Patricio Bakıda təşkil olunan tədbirin məhz bu sahədə bacarıqların artırılması baxımından böyük əhəmiyyət daşıdığını qeyd edib və təlimin işinə uğurlar diləyib.
Tədbirdə ICOMOS Dünya İrs Mərkəzinin Direktoru Gwenaelle Bourdin
təlim proqramının əsas istiqamətləri və məqsədlərinə dair təqdimat
keçirib. Qeyd edib ki, ilk dəfə olaraq ICOMOS təşkilatının dəvəti
ilə dünyanın müxtəlif regionlarını əhatə edən 17 ölkədən olan
ekspertlər, mədəni irs sahəsində mütəxəssislər Bakıya gəliblər.
Tədbir iştirakçıları arasında İsrail, Türkiyə, Bolqarıstan,
Sloveniya, Rusiya, Rumıniya, Moldova, Gürcüstan, Pakistan,
Qazaxıstan, Özbəkistan, Misir, Oman və digər ölkələrdən
mütəxəssislər var.
Təlim çərçivəsində Fransa, Polşa və Gürcüstandan dəvət edilən
təcrübəli təlimçilər tərəfindən müxtəlif mövzular üzrə Ümumdünya
İrs Konvensiyasının qayda və prosedurları, o cümlədən UNESCO-nun
Ümumdünya İrs Ərazilərinin seçim meyarları, bu ərazilərin idarə
olunmasına mənfi təsirlər və risklər barədə müzakirələr və təcrübə
mübadiləsi aparılıb.
Beş gün davam edəcək tədbir çərçivəsində iştirakçılar öz ölkələrindəki Ümumdünya İrs ərazilərinə dair təqdimatla çıxış edəcəklər. Tədbirin praktiki hissəsinin Ümumdünya İrs Ərazisi olan İçərişəhər, Qız Qalası və Şirvanşahlar Saray Kompleksində keçirilməsi nəzərdə tutulur.
