Bakı. Trend:
Hazırda dünyada qütbləşmələr mövcuddur. Bu səbəbdən sülhlə yanaşı, ədalətdən də danışmalıyıq.
Trend xəbər verir ki, bu barədə Strateji Araşdırmalar İnsititunun direktoru, səfir Sohel Mahmud VI Mədəniyyətlərarası Dialoq Forumu çərçivəsində keçirilən “Sosial media: mədəniyyətlər və insanlar arasında körpü və ya sədd?” adlı panel sessiyasında çıxışı zamanı deyib.
“Dinlər arasında sülh və dialoq çox vacibdir. Dialoq qurulması üçün təklif verilməklə yanaşı, real addımlar atılmalıdır. Yeni texnologiyaların yaradılması və sosial mediadan aktiv istifadə dünyanı çox mürəkkəb yerə çevirib. Bunun nəticəsində rəqəmsal texnologiyalar artdı və məlumatlara çıxışımız asanlaşdı.
Amma bunun mənfi tərəflərindən biri də dezinformasiyalardır. Hansı ki, bunlar dünyanın parçalanmasına şərait yaradır”,- deyə o bildirib.
Qeyd edək ki, Bakıda VI Ümumdünya Mədəniyyətlərarası Dialoq Forumu keçirilir.
“Sülh və Qlobal Təhlükəsizlik Naminə Dialoq: Əməkdaşlıq və Qarşılıqlı Əlaqələr” mövzusunda keçirilən forumda dünyanın müxtəlif ölkələrindən ümumilikdə 700 qonaq iştirak edir.
100-dən çox ölkəni təmsil edən iştirakçılar arasında nazirlərlə yanaşı, 60-a yaxın ölkənin mədəniyyət nazirliklərinin, 28 beynəlxalq təşkilatın nümayəndələri var. Forum çərçivəsində on panel müzakirə və dörd plenar sessiyanın keçirilməsi nəzərdə tutulur.
Azərbaycan Mədəniyyət Nazirliyinin təşkilatçılığı ilə keçirilən
tədbir beynəlxalq təşkilatlar, o cümlədən, Birləşmiş Millətlər
Təşkilatının Sivilizasiyalar Alyansı (UNAOC), UNESCO, İSESCO və
BMT-nin Ümumdünya Turizm Təşkilatının tərəfdaşlığı ilə
keçirilir.
Tədbir 1-3 may tarixlərini əhatə edəcək.