"Korrupsiyaya Qarşı Mübarizə Fondu"nun və Azərbaycanda Vətəndaş Cəmiyyətinin İnkişafına Yardım Assosiasiyasının birgə təşkilatçılığı ilə Sumqayıt şəhərində geniş tərkibli toplantı keçirilib. Trend in məlumatına görə, tədbirdə müstəqil hüquqşünaslar, Sumqayıt Sahibkarlar Assosiasiyasının prezidenti, İnsan Hüquqları Resurs Mərkəzinin, digər qeyri-hökumət təşkilatlarının və siyasi partiyaların təmsilçiləri, həmçinin Sumqayıt şəhər təhsil və səhiyyə şöbəsinin, şəhər bələdiyyəsinin, maliyyə və polis idarəsinin, prokurorluğun rəhbər vəzifəli şəxsləri, o cümlədən bir sıra deputatlığa namizədlər də iştirak ediblər.
Qeyd edək ki, "Korrupsiyaya Qarşı Mübarizə Fondu"nun və Azərbaycanda Vətəndaş Cəmiyyətinin İnkişafına Yardım Assosiasiyası respublikada, xüsusilə də bölgələrdə korrupsiyanın səviyyəsi və onunla mübarizə sahəsində görülən işlərin təhlilini aparmaq məqsədilə silsilə tədbirlər həyata keçirirlər. Ölkənin bütün regionlarını əhatə edəcək belə tədbirlərin məqsədi korrupsiya ilə mübarizəyə ictimaiyyətin bütün təbəqələrinin nümayəndələrini cəlb etməklə bu problemə qarşı birgə mübarizə aparılmasından ibarətdir.
Sumqayıtda keçirilən tədbirdə çıxış edən "Korrupsiyaya Qarşı Mübarizə Fondu"nun icraçı direktoru Vasif Mövsümov bildirib ki, dəyirmi masının əsas məqsədi bu ilin əvvəlindən qüvvəyə minən "Korrupsiyaya qarşı mübarizə haqqında" AR Qanununa Sumqayıtda dövlət orqanları tərəfindən necə əməl olunduğunu, şəhərdə korrupsiyanın səviyyəsi və buna qarşı indiyə qədər hansı tədbirlərin həyata keçirildiyini ictimaiyyətin nümayəndələri ilə birgə müzakirə etməkdir. Onun sözlərinə görə, aparılan müşahidələr və tədqiqatlar zamanı məlum olub ki, Sumqayıt şəhərində korrupsiya təhsil və səhiyyədə, məhkəmə sistemi, Dövlət Yol Polisi və Mənzil İstismar İdarələri sahələrində daha geniş yayılıb.
Tədbirdə çıxış edən "Korrupsiyaya Qarşı Mübarizə Fondu"nun hüquqşünası Nəzirməmməd Qaramanlının sözlərinə görə,dünyada belə bir təcrübə yoxdur ki, korrupsiyanın qarşısının alınması üzrə ixtisaslaşmıs orqan olan Korrupsiyaya qarşı mübarizə üzrə Komissiya bizdə olduğu kimi bütünlüklə dövlət hakimiyyəti orqanları nümayəndələrindən ibarət olsun. Belə komissiyalar dövlət statusu ilə fəaliyyət göstərməli və orada dövlət, QHT, özəl sektorun və digər sahələrin nümayəndələri də təmsil olunmalıdırlar.
Sonda dəyirmi masa iştirakçıları tərəfindən qərara alınıb ki, tədbirdə iştirak edən şəxslərin təşəbbüsü və "Korrupsiyaya Qarşı Mübarizə Fondu"nun köməyilə ilə Sumqayıtda korrupsiya ilə daha fəal mübarizə aparmaq üçün ictimaiyyətin və dövlət orqanlarının iştirakı ilə Antikorrupsiya Koordinasiya Şurası yaradılsın. Şuranın əsas funksiyası korrupsiya ilə üzləşmiş vətəndaşların və hüquqi şəxslərin ərizə və şikayətlərinin dövlət orqanlarına çatdılırması, həmin orqanlarda müraciətlərin baxılmasını nəzarətdə saxlamaq və eləcə də onlara pulsuz hüquqi yardım göstərməkdir. Koordinasiya Şurasının təsis olunması və fəaliyyəti üçün işçi qrupu yaradılıb.
