"Redaktorlar Birliyi", Xaqani 33 ünvanında yerləşən qurumlar bu həftə Dövlət Əmlakının İdarə Edilməsi üzrə Dövlət Komitəsinin binası qarşısında, gələn həftə iəs Prezident Aparatı yaxınlığında etiraz aksiyası keçirəcəklər. Bu barədə Trend ə "Azadlıq" qəzetindən məlumat verilib.
Qeyd edək ki, AXCP, "Azadlıq" qəzeti və digər qurumlar yerləşdikləri Xaqani küçəsi 33 ünvanındakı binadan çıxarılmalarına etiraz olaraq həm piketlər, həm də aclıq aksiyası keçirilər. Bu gün - noyabrın 20-də "Azadlıq" qəzetinin redaksiyasında Redaktorlar Birliyinin toplantısı keçirilib, aclıq edənlərə aksiyanı dayandırmaları üçün müraciət olunub. Lakin "Azadlıq"ın baş redaktoru Qənimət Zahid aclığı davam etdirəcəyini bildirib.
Bu gün həm də Ombudsman Apartının nümayəndələri redaksiyaya gələrək aclıq edənlərə baş çəkiblər. Onlar aclıq keçirənlərin səhhəti ilə maraqlanıb, Ombudsman Aparatının bu problemin həllinə çalışacağını, məhkəmə prosesini nəzarətdə saxlayacağını deyiblər.
Gələn həftə Prezident Aparatının yaxınlığında piket keçirilməsi ilə bağlı noyabrın 21-də Bakı Şəhər İcra Hakimiyyətinə müraciət olunacaq. Bu həftə Dövlət Əmlakının İdarə Edilməsi üzrə Dövlət Komitəsinin qarşısında keçiriləcək piketlə bağlı isə yalnız qəzetdə elan veriləcək, paytaxt rəhbərliyinə məktub göndərilməyəcək.
