Azərbaycan, Bakı / Trend müxbir K. Zərbalıyeva/ Çin Xalq Respublikasının həbsxanalarında 10 nəfər Azərbaycan vətəndaşı cəza çəkir. Ədliyyə Nazirliyinin Beynəlxalq Əməkdaşlıq İdarəsinin rəisi Zavər Qafarov Trend ə bildirib ki, həmin məhkumlardan 5-i Uyğur Muxtar Rayonunda, 1-i Yunnan əyalətində, 4-ü isə Pekindəki cəzaçəkmə müəssisələrində saxlanılır. Çin ərazisində cinayət törədən Azərbaycan vətəndaşları quldurluq, narkotik vasitələrin qanunsuz dövriyyəsi, oğurluq və qəsdən adamöldürmə cinayətlərinə görə məhkum olunublar.
Qafarovun sözlərinə görə, Çinlə Azərbaycan arasında məhkumların verilməsi haqqında müqavilə olmadığından bu prosesin qarşılıqlıq prinsipi əsasında həyata keçirilməsi barədə razılığa gəlinib. Azərbaycanlı məhkumların bir qismi vurulan ziyanı ödəmədiyi üçün onların Azərbaycana verilməsi prosesi yubanır. Qafarov bildirib ki, vurulan ziyan ödənildikdən sonra məhkumlar respublikaya gətiriləcək.
İdarə rəisi Azərbaycanın cəzaçəkmə müəssisələrində Çin vətəndaşlarının saxlanmadığını deyib.