Azərbaycan, Bakı / Trend müxbir K Zərbalıyeva / Məhkəmə-Hüquq Şurası 6 hakimi cəzalandırıb. Məhkəmə-Hüquq Şurasından cümə günü Trend ə verilən məlumata görə, qanunvericiliyin tələblərini, o cümlədən mülkiyyət hüquqlarını pozduqlarına, işlərə süründürməçiliklə baxdıqlarına, vətəndaşları əsassız get-gələ salmalarına görə Apellyasiya Məhkəməsinin hakimləri Maisə Hüseynovaya, Lətif Nəbiyevə, Salman Hüseynova, Səbayel rayon məhkəməsinin hakimi Alim Namazova töhmət verilib, Apellyasiya Məhkəməsinin hakimi Rasim İsgəndərova və Füzuli-Qubadlı Hərbi Məhkəməsinin hakimi Elnur Cəbiyevə isə irad tutulub.
Bəzi hakimlərin işlərə baxılmasında ciddi pozuntulara yol verdiklərinə, vətəndaşların hüquqlarının həyata keçirilməsinə süni maneələr yaratdıqlarına görə Məhkəmə-Hüquq Şurası tərəfindən Bakı şəhərinin rayon məhkəmələrinin 5 hakimi barədə intizam icraatı başlanılıb.
Bu barədə qərar Şuranın iclasında qəbul olunub.