Azərbaycan, Bakı / Trend müxbir E.Hüseynli/ İyunun ilk günü havanın temperaturu yüksəlsə də, ayın birinci ongünlüyündə Azərbaycanda qeyri-sabit, sərin hava şəraiti hökm sürəcək. Bu barədə cümə axşamı Ekologiya və Təbii Sərvətlər Nazirliyinin (ETSN) Milli Hidrometeorologiya Departamentinin direktor müavini Umayra Tağıyeva məlumat verib.
Onun sözlərinə görə, hesabat dövründə havanın temperaturu iqlim normasına yaxın, bəzi hallarda aşağı olacaq. Tağıyeva bildirib ki, bu müddətdə Azərbaycanın bəzi yerlərində yağış yağacaq. Bu dağətəyi ərazilərdə lokal xarakter daşıyacaq. Cənub küləyi şimal küləyi ilə əvəzlənəcək.
İyunun birinci ongünlüyündə maksimal temperatur gündüz saatlarında 22-27 dərəcə olacaq.
Mayın ortalarından başlayaraq Azərbaycanda havanın temperaturu yüksəlmişdi. Maksimal temperatur 33-37 dərəcə olmuşdu.