Azərbaycan, Bakı, 10 dekabr /Trend/
Almaniyanın əfsanəvi futbolçusu Herd Müller il ərzində vurulan qolların sayına görə Lionel Messinin ona məxsus rekordu təzələməsinə münasibət bildirib. Trend-in xarici mətbuata istinadən verdiyi məlumata görə, Müller argentinalı futbolçunun buna layiq olduğunu deyib.
"Hərçənd futbolda müdafiənin indiki səviyyəsini nəzərə alsaq, daha çox qol vurmaq olar. 1972-ci ildə imza atdığım rekord 40 il təzələnmədi. Həmin vaxt 60 oyunda 85 qol vurdum. İndi isə dünyanın ən yaxşı oyunçusu rekordumu təzələdi. Messinin sevincini bölüşürəm. O, qeyri-adi futbolçudur. Üstəlik, o, mehriban, təvazökar oğlandır. Ümid edirəm ki, Messi bu il qalan matçlarda daha bir neçə dəfə fərqlənəcək. Qoy, onun rekordu daha 40 il təzələnməsin", - alman futbolçu vurğulayıb.
Onun sözlərinə görə, Messinin yeganə çatışmazlığı onun Münhenin "Bavariya" klubunda oynamamasıdır.