Bakı. Trend:
“Nəticədən çox razıyam. Biz var gücümüzlə bu yarışlara hazırlaşmışdıq”. Trend-in məlumatına görə, bunu Gənclər və İdman Nazirliyinin mətbuat xidmətinin rəhbərinə açıqlamasında ölkəmizə Rio-2016-da kayak yarışlarında bürünc medal qazandıran İnna Osipenko-Radomskay deyib.
İdmançı təəssüratlarının böyük olduğunu bildirib: “Təəssüratlarım böyükdür, çünki bu Olimpiya Oyunlarıdır və çox məsuliyyətli yarışdır. Qarşıda hələ məni 500 metrlik məsafədə yarış gözləyir, ona görə 200 metrlikdə əldə etdiyim nəticə mənim üçün yaxşıdır”.
İ.Osipenko-Radomskay bildirib ki, Olimpiya yarışmasına qatılmaq hər bir idmançının arzusudur: “Birinci, ikinci və ya üçüncü yer fəqri yoxdur, əsas odur ki, Olimpiadada medal qazanasan. Çünki milyonlarla insan idmanla məşğul olur, lakin onlardan çox azına Olimpiadada iştirak etmək nəsib olur və medal qazanmaq isə unudulmaz andır. 500 metrlikdə də əlimdən gələni edəcəm və inanıram ki, hər şey yaxşı olacaq”.