Bakı. Trend:
InvestAZ İnvestisiya şirkətinin analitikləri bu həftə üzrə dünya maliyyə bazarlarında son vəziyyət və qısa müddət ərzində gözlənilənlərlə bağlı məlumat verib.
EUR
Amerika Mərkəzi Bankının (FED) faiz artımına gedəcəyi gözləntilərinin dünya maliyyə bazarlarında yüksək olması və Avrozonada siyasi və iqtisadi risklərin də artması, avronun qiymətini də təzyiq altında saxlayır.
InvestAZ analitiklərinin fikrincə, 1.18$-ın altında ticarət edilən EUR/USD məzənnəsi 1.1700$-a kimi ucuzlaşaraq, bu səviyyənin altında qalarsa, 1.1618$ və 1.1470$-a kimi də ucuzlaşa bilər.
Eyni zamanda, Avropa Mərkəzi Bankının cümə axşamı Bakı vaxtı ilə saat 15:45-də açıqlayacağı pul siyasəti ilə bağlı qərarı və saat 16:30-da baş tutacaq bankın mətbuat konfransı da investorların diqqət mərkəzindədir.
GBP
İngiltərə ilə Avropa Birliyi arasında “BREKSİT” danışıqlarının uğursuzluğu, İngiltərədə hökümətə qarşı olan təzyiqləri artırmaqla yanaşı, ölkə valyutasına olan inamın da zəifləməsinə təsir edir. Təhlillərə əsasən, 1.33$-ın altında ticarət edilən GBP/USD valyuta cütlüyünün qiyməti gələcək günlər ərzində daha da ucuzlaşa bilər. Belə ki, məzənnə 1.3087$-ı aşağı istiqamətdə qırarsa, burada 1.2948$-a kimi sürətlənən eniş dalğasının şahidi ola bilərik.
Bu həftənin çərşənbə günü Bakı vaxtı ilə saat 12:30-da açıqlanacaq İngiltərənin 3-cü rüb üzrə iqtisadi inkişaf göstəricisi də funt/dollar qiymətinə güclü təsir edə bilər.
TRY
Türkiyə maliyyə bazarlarında Dollar/Lirə məzənnəsi 3.70TL-ə kimi bahalaşıb və qiymət 3.68TL-nin üzərində qalarsa, 3.73TL-ə kimi də bahalaşa biləcəyi proqnozlaşdırılır.
Bununla yanaşı, cümə axşamı saat 15:00-da açıqlanacaq Türkiyə Mərkəzi Bankının faiz qərarı da maliyyə bazarlarında böyük maraqla gözlənilir.
OIL
Enerji bazarlarında isə Avropanın Brent markalı neftinin bir barel qiyməti 57-58$ aralığında ticarət edilməkdədir. Qiymətin 59.37$ və 63.31$-a kimi də bahalaşa biləcəyini proqnozlaşdıran treyderlər, cari həftənin ilk sessiyasında qiymətin 58$-ın üzərində möhkəmlənməsini gözləyirlər. Dünya bazarlarında neftə olan tələbin artması, qiymətlərin də bahalaşmasına təsir edir.
GOLD
FED-in faiz artımı gözləntilərinin yüksək olması qızıl qiymətlərini də təzyiq altında saxlayır. Yenidən 1274$-a (41.2 $/qram) kimi dəyər itirən qızılın bir unsiya üzrə qiyməti 1278$-ın altında qaldıqca, 1268$ (40.7 $/qram) və 1253$-a (40.2 $/qram) kimi də ucuzlaşa bilər.
İnvestisiya ilə bağlı suallarınızı *1234 telefon nömrəsi və www.investaz.az veb saytı vasitəsilə bizə ünvanlaya bilərsiniz.
“İnvest-AZ İnvestisiya Şirkəti” Qapalı Səhmdar Cəmiyyətinin fəaliyyəti Azərbaycan Respublikası Maliyyə Bazarlarına Nəzarət Palatası tərəfindən tənzimlənir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərməkdədir.
Risk bildirişi
Yuxarıda göstərilən məlumatlar tamamilə tövsiyə xarakterlidir. Bu fəaliyyət üzrə həyata keçirilən əməliyyatlar yüksək risk qrupuna daxildir və “İnvest-AZ İnvestisiya Şirkəti” QSC yuxarıda göstərilən məlumatlar əsas götürülməklə, həyata keçirilən investisiya əməliyyatları üzrə heç bir öhdəlik daşımır.