Bakı. Trend:
Gürcüstan infrastruktur layihələri və strateji coğrafi mövqeyi sayəsində Orta Dəhlizdəki rolunu gücləndirir.
Trend-in Beynəlxalq konsaltinq şirkəti PMCG-yə istinadən məlumatına görə, bunu PMCG-nin aparıcı iqtisadçısı Giorgi Papava Vaşinqtonda Gürcüstanla ABŞ arasında ikitərəfli münasibətlərə həsr olunmuş Amerika–Gürcüstan Biznes Şurasının (AGBC) 28-ci illik toplantısında çıxışı zamanı bildirib.
Şirkətin məlumatına əsasən, G.Papava Çin və Mərkəzi Asiyanı Cənubi Qafqaz vasitəsilə Avropa ilə birləşdirən qitələrarası marşrut olan Orta Dəhlizin artan strateji əhəmiyyətini vurğulayıb.
O qeyd edib ki, ötürücülük qabiliyyəti, xərclər və logistika ilə bağlı mövcud çağırışlara baxmayaraq, Gürcüstanın coğrafi mövqeyi və davam edən infrastruktur inkişafı bu getdikcə daha əhəmiyyətli nəqliyyat dəhlizində ölkənin rolunu gücləndirir:
“Poti limanının genişləndirilməsi, dəmir yollarının modernləşdirilməsi və Anakliya dərin dəniz limanı layihəsinin irəlilədilməsi kimi layihələr regionun şaxələndirilmiş ticarət və investisiyaların cəlb edilməsi potensialını əlavə olaraq artıra bilər”.
Qeyd olunur ki, Gürcüstan formal olaraq C5+1 platformasının iştirakçısı olmasa da, Papava ölkənin daha geniş regional proseslərdəki əhəmiyyətini xüsusi vurğulayıb. ABŞ-nin Mərkəzi Asiyada, xüsusilə energetika, təchizat zəncirlərinin şaxələndirilməsi və nəqliyyat əlaqəliliyinin gücləndirilməsi sahələrində artan fəallığı Gürcüstan üçün Mərkəzi Asiya bazarları ilə Avropalı tərəfdaşlar arasında əlaqələndirici rolunu oynamaq imkanları yaradır. Bu isə Gürcüstanı transregional əməkdaşlıqla formalaşan daha geniş strateji kontekstdə ön plana çıxarır.
Qeyd edək ki, Orta Dəhliz regionun bir sıra ölkələrindən keçən, Asiya ilə Avropanı birləşdirən nəqliyyat və ticarət marşrutudur. Bu, ənənəvi Şimal və Cənub dəhlizlərinə alternativdir.
Marşrut Çindən başlayır və Qazaxıstan, Özbəkistan və Türkmənistan kimi Mərkəzi Asiya ölkələrindən keçərək, Xəzər dənizi, Azərbaycan, Gürcüstan və Türkiyədən keçərək Avropaya çatır. Orta Dəhliz Asiyanın şərq bölgələrini, o cümlədən, Çini Avropa ilə birləşdirən, daha uzun dəniz yollarından yan keçməklə quru yolu təklif edir.