Azərbaycan, Bakı / Trend , U.İsmayılova/ Azərbaycan Vergilər Nazirliyi cümə günü Bakının iri ticarət mərkəzlərindən birində kassa aparatının fiskal yaddaşına müdaxilə edən fakt aşkar edib. Bu barədə cümə günü Nazirliyin xüsusilə mühüm işlər üzrə müstəntiqi Miri Bağırov məlumat verib. Nazirlik nümayəndələri qanun pozuntusu qeydə alınan mərkəzin adını açıqlamayıblar.
"Kassa aparatına müdaxilə nəticəsində, ticarət mərkəzi ilin əvvəlindən 250 min manata yaxın vergi ödəmələrindən yayınıb" - deyə Bağırov bildirib.
Kassa aparatında müdaxiləni "Lider" şirkətinin kassa aparatlarının texniki servis xidmətlərinin icrası üzrə ixtisaslaşmış əməkdaşı həyata keçirib.
Ticarət mərkəzinin rəhbəri və servis şirkətinin əməkdaşının razılaşmasına görə, 5 min manata yaxın gündəlik gəlir süni şəkildə 400 manata qədər azaldılıb.
Bunun nəticəsində, Bakı şəhəri üzrə 18 faiz ƏDV ödəməli olan mərkəz 4 faiz təşkil edən sadələşdirilmiş vergi ödəyicisinə çevrilir.
Nazirlik nümayəndələri bildiriblər ki, "Lider" şirkəti kassa aparatlarının servisi ilə məşğul olur. Onların sözlərinə görə, şirkətin fəaliyyəti Bakının iki iri rayonunu - Xətai və Nərimanov rayonlarını əhatə edir.
Bağırovun sözlərinə görə, hüquq- mühafizə orqanları hər iki qanun pozucusunu yaxalayıb. Araşdırma aparılır.
Azərpbaycan Vergilər Nazirliyinin məlumatına görə, yanvar-sentyabr ərzində vergi üzrə qanun pozuntusu ilə bağlı 300 fakt aşkar olunub.
