Azərbaycan, Bakı/ Trend müxbir İ.Xəlilova/ Azərbaycan İnvestisiya Şirkəti (AİŞ) və Özəl Sektorun İnkişafı İslam Korporasiyası (İCD) (İslam İnkişaf Bankı qrupuna daxildir) noyabrın 29-da müştərək şirkətin yaradılması üçün memorandum imzalayacaqlar. Bu barədə çərşənbə günü İqtisadi İnkişaf Nazirliyindən bildiriblər. AİŞ-in Müşahidə Şurasının qərarına əsasən, İCD ilə yaradılacaq şirkətdə onun payı 25 faiz təşkil edəcək və bunun üçün o, 14 mln. dollar ödəyəcək. İnvestisiya Şirkəti şəriət qanunlarına zidd olduğu üçün spirtli içkilər və donuz əti tərkibli məhsullar istehsal edən müəssisələr, həmçinin maliyyələşdirmə və sığorta xidməti göstərmənin standart şərtləri əsasında fəaliyyət göstərən banklar və sığorta şirkətləri istisna olmaqla, ölkənin qeyri-neft sektorundakı müəssisələrə investisiya yatıracaq. İki il ərzində investisiya şirkətinin kapitalı 70 mln. dollara çatdırılacaq. Şirkət təkcə AİŞ və İCD deyil, Yaxın Şərq və Fars körfəzi ölkələrindən olan investorların da vəsaitləri hesabına formalaşdırılacaq. "İCD-nin təcrübə və nüfuzunu nəzərə alaraq düşünürəm ki, investisiya şirkəti vasitəsilə ərəb ölkələrindən investisiyalar cəlb etmək üçün yaxşı şanslar var" - AİŞ sədri Anar Axundov hesab edir. Belə maliyyə institutunun yaradılması ideyası ərəb investor institutlarının iştirakı ilə 2006-cı il noyabrın 8-dən 9-dək Bakıda keçirilmiş investisiya konfransı çərçivəsində İİB prezidenti Əhməd Məhəmməd Əli tərəfində irəli sürülüb. 1992-ci ildən İİB Azərbaycanda dəyəri 250 mln. dollar olan 26 layihə maliyyələşdirib. İCD isə Azərbaycan banklarına təxminən 10 mln. dollar həcmində kredit xətti açıb.
...
