Azərbaycan, Bakı / Trend , müxbir Ü.İsmayılova/ 2008 - ci ildə Azərbaycanda inflyasiya 30 faiz həddində olacaq. Bu barədə cümə axşamı İqtisadi Araşdırmalar Mərkəzi QHT İdarə Heyəti sədrinin müavini Vüsal Qasımlı məlumat verib. "2007 - ci ilin sonuna inflyasiyanın səviyyəsi 25 faiz təşkil edəcək" - Qasımlı bildirib. Mərkəzin hesablamalarına görə, okytabrın 15 - dən noyabrın 15 - dək, günəbaxan yağı 37.5 faiz, qarğıdalı yağı 31.25 faiz, duz 50 faiz, çörək 20 faiz bahalaşıb. Qasımlının sözlərinə görə, ölkədəki inflyasiyanın səviyyəsinə xarici faktorlar da böyük təsir göstərir. Dünya bazarında ərzaq mallarının son qiymət artımı idxal edilən məhsulların qiymətinə təsir edib. Dünya ərzaq malları bazarında ərzaq mallarının qiymət artımı 30 faiz təşkil edib. Qasımlı bildirib ki, bu, inflyasiyaya xarici təsirin yeganə faktoru deyil. Digər bir faktor ölkə idxalının həcminin səhv hesablanmasıdır. Azərbaycanın əsas idxalçı ölkələri İran, Rusiya və Türkiyədir. İranın Statistika üzrə Dövlət Komitəsinin 2005 - ci il üçün hesablamalarına görə, İran Azərbaycana 310 mln. dollar, Azərbaycanın Dövlət Statistika Komitəsinin hesablamalarına görə isə, 86 mln. dollar dəyərində mal ixrac edib. Rusiya Statistika idarəsinin 2007 - ci ilin yanvar- sentyabrı üçün hesablamalarına görə, Azərbaycana 922 mln. dollar, Azərbaycan Dövlət Statistika İdarəsinin məlumatlarına görəsə, 697 mln. dəyərində mal ixrac edib.Türkiyə Dövlət Statistika İdarəsinin hesablamalarına görə, 9 ay ərzində Azərbaycana 705 mln. dollar, Azərbaycanın hesablamalarına görə isə, 394 mln. dollar mal ixrac edib. İqtisadi Araşdırmalar Mərkəzinin hesablamalırna görə, yanvar - fevral ərzində ölkədə inflyasiyanın səviyyəsi 22.15 faiz təşkil edib. Statistika üzrə Dövlət Komitəsinin məlumatlarına əsasən, 10 ay ərzində ölkədə inflyasiyanın səviyyəsi 16 faizdən yuxarı olub.
...