Azərbaycan, Bakı/ Trend , müxbir İ.Xəlilova / Azərbaycanın valyuta ehtiyatlarının inkişaf templərinin sürətləndirilməsi valyutanın idarə edilməsinin səmərəliliyini artırır.
Azərbaycanın Milli Bankının gələn il üçün pul siyasətinin əsas istiqamətləri barədə dekabrın 28-də yaydığı məlumatda bildirilir ki, valyuta ehtiyatlarırın idarə edilməsi strategiyası yeni investisiya siyasətinə uyğun olaraq müəyyən olunacaq. Bu strategiyanın əsas komponenti müxtəlif valyutalarda ehtiyatların diversifikasiyası və bir valyutadan asılılığa son qoyulması olacaq. Bu da ehtiyatların mütləq dəyərini qoruyub saxlamağa, nəticədə, ölkənin iqtisadi təhlükəsizliyini qorumağa imkan verəcək.
2007-ci ildə Milli Bank tərəfindən valyuta təkliflərinin sterilləşdirilməsi nəticəsində, valyuta ehtiyatları 1,4 mlrd. dollar artaraq, 3,759 mlrd. dolları ötüb. Valyuta ehtiyatlarırın idarə edilməsindən bir il ərzində 150 mln. dollar əldə olunub.
Hazırda üç menecerin -- Dünya Bankının xəzinəsi, İsveçrənin UBS bankı və Amerikanın "JP Morgan" şirkətlərinin idarəsində 270 mln. dollar vəsait var. Vəsaitlərin idarə edilməsinin qeyri-səmərəli olması ilə əlaqədar olaraq, Milli Bank Hollandiyanın ABN Amro şirkəti ilə müqaviləni pozub və şirkətin ixtiyarında olan pulları UBS-ə verib. Hazırda Dünya Bankının ixtiyarında 110 mln., UBS-in ixtiyarında 105 mln. dollar, "JP Morgan"ın ixtiyarında 55 mln. dollar var.
Məlumatda bildirilir ki, 2008-ci ildə kapitalın hərəkətinin defisitinin aşağı düşməsi nəticəsində, qeyri- neft sektoruna xarici investisiya axınının güclənməsi səbəbindən, bank sektoru vasitəsilə Azərbaycanın strateji valyuta ehtiyatları 19 mlrd. dollara çatacaq. Gələn il ölkənin cari ödəmə balansının profisitinin 14 mlrd. dollar dəyərində olacağı gözlənilir.
Strateji valyuta ehtiyatları Milli Bankın ehtiyatlarından, Dövlət Neft Fondunun aktivlərindən və dövlət xəzinəsinin valyuta ehtiyatlarından formalaşdırılır.
