Azərbaycan, Bakı, 28 yanvar/ Trend , müxbir İ.Xəlilova/ Dünya Bankı və Azərbaycan hökuməti arasında Məcburi Köçkünlərin sosial şəraitlərinin yaxşılaşdırılması layihəsinin genişləndirilməsi üzrə rəsmi danışıqlar yanvarın 27-də, videokonfrans vasitəsilə başlayıb. Bu barədə bazar ertəsi DB -nin Bakı nümayəndəliyindən məlumat veriblər. Bank əlavə maliyyələşdirmə kimi $15 mln. ayırmağa hazırdır. Hökumətin layihədə payı isə $5 mln. təşkil edəcək.
Kreditin DB Direktorlar Şurasında martda təsdiq ediləcəyi gözlənilir.
Əlavə kredit ehtiyatları məcburi köçkünlərin AR-nın Qaçqın və Məcburi Köçkünlərin Sosial İnkişaf Fondu vasitəsilə həyata keçirilən mikrolayihələrinin maliyyələşdirilməsi üçün nəzərədə tutulub. Mikrolayihələr infrastruktur sahəsində və xidmətlər sekotrunda - yolların bərpası, elektrik təchizatı, su təchizatı, subartezian quyularının tikintisində həyata keçiriləcək. DB-nin krediti Beynəlxalq İnkişaf Assosiasiyasının (BİA) vəsaitləri hesabına ayrılacaq. 2008-ci il maliyyə ilində Azərbaycan BİA xətti ilə sonuncu güzəştli maliyyələşdirmə kvotasını alacaq. Kvotanın ümumi həcmi $131 mln. təşkil edir.
Azərbaycan hökuməti bunu nəzərə alaraq, bankdan IDP EDSP layihəsi üçün əlavə vəsait istəyib. Əvvəlki kredit $11,5 mln. məbləğində olub və 2005-ci il fevralın 15-də bankın Direktorlar Şurasında təsdiq edilib. Vəsait, 10 il möhlət olmaqla, 35 ilə, 0,75% dərəcə ilə ayrılıb.
