Azərbaycan, Bakı, 12 fevral / Trend , müxbir İ.Xəlilova/ Avropa Yenidənqurma və İnkişaf Bankı (AYİB) nümayəndəliyinin yeni rəhbəri Fransis Delei (Francis Delaey) vəzifəsinin icrasına başlayıb. Bu barədə çərşənbə axşamı AYİB-in Bakı ofisindən məlumat verilib. Bu vəzifəyə təyin olunana qədər o, AYİB -in Moldovadakı nümayəndəliyinə rəhbərlik edirdi.
AYİB-in 2006-cı ildə Bakı ofisinə təyin olunan əvvəlki təmsilçisi Aygen Yaikoğlu, ötən ilin avqustunda vəzifə müddətinin bitməsini gözləməyərək, vaxtından əvvəl ölkəni tərk edib. Avropa Bankının qaydalarına əsasən, təmsilçilər bu vəzifəyə 3-4 il müddətinə təyin olunur.
Avropa Bankı 90-cı illərdən başlayaraq, Azərbaycanda fəal əməliyyatlar aparır. 2007-ci ilin 18 sentyabrda təsdiq olunan Azərbaycan üzrə yeni strategiyaya müvafiq olaraq, AYİB özəl və ictimai bölmədə işi fəallaşdırmaq, investisiya mühitinin yaxşılaşdırılması üçün hökumətlə dialoqları davam etdirmək niyyətindədir. Qeyri-neft sektorunda iqtisadiyyatın diversifikasiyası üçün bank yerli müəssisələr və investorlarla işləyəcək. Həmçinin, kənd təsərrüfatını inkişaf etdirmək və bu sahədə standartların beynəlxalq səviyyəyə qaldırılması planlaşdırılır. AYİB Azərbaycanın bank sektorunun inkişafında liderliyini qoruyub saxlamaq, həmçinin, əsas nəqliyyat, energetika, infrastruktur layihələrində iştirakını artırmaq niyyətindədir.
Avropa Bankı Azərbaycanın neft-qaz sektorunu yeni texnologiyalarla təchiz edə biləcək xarici investorlar axtarmağa da hazırdır. Bank dövlətin prioritetlərinə müvafiq olaraq, kənd təsərrüfatı bölməsinə də diqqət artıracaq. Bu sahədə əsas diqqət meyvə və tərəvəz emalı, şirə və sərinləşdirici içkilər istehsalı, onların topdan və pərakəndə satışına ayrılacaq.
2007-ci il iyunun 30-da AYİB Azərbaycanla təbii sərvətlər, energetika, nəqliyyat, aqrobiznes, daşınmaz əmlak sahələrində ümumilikdə 739,1 mln. avro dəyərində 80 ölkə və regional layihə imzalayıb. İyunun 30-na bankın xalis portfeli 162,6 mln. avro, əməliyyat vəsaitləri də daxil olamaqla, 482,4 mln. avro təşkil edib.
Avropa bankı portfelində əsas rolu təbii sərvətlər sektoru tutur və onun payı ümumi həcmin 32,7 faizini təşkil edib.
Müəlliflə əlaqə saxlamaq üçün elektron ünvan : [email protected]
