Azərbaycan, Bakı, 12 fevral / müxbir İ.Xəlilova/ Avropa Yenidənqurma və İnkişaf Bankı (AYİB) dövlət müəssisələrinin özəlləşdirilməsində iştirak etməyə və 30 faizədək səhmləri almağa hazırdır. Bu barədə çərşənbə axşamı Avropa Bankının Bakı nümayəndəliyinin rəhbəri Fransis Delei məlumat verib.
"AYİB-in dövlət müəssisələrinin yenidənqurulması və sağlamlaşdırılmasında böyük iştirak təcrübəsi var və bank fərdi layihələr əsasında özəlləşdirmə prosesinə böyük vəsaitlər yatırır", - Delei bildirib.
Onun sözlərinə görə, özəlləşdirmə prosesində əsas diqqət müəssisələrin şəffaflığına yönəldilir. Lakin layihənin kommersiya istiqaməti də nəzərdən keçirilir. Müəssisəni seçərkən AYİB onun özəlləşdirmədənqabaq restrukturizasiyasına texniki yardım göstərməyə hazırdır.
"Biz investisiya yatıra və kapitalın artırılmasında iştirak edə bilərik. Lakin AYİB maliyyə nöqteyi-nəzərdən özünü doğruldan və investisiyaların geri qaytarılmasını təmin edən layihələrdə iştirak etməyə üstünlük verir. Bundan əlavə, strateji investor kimi üstünlük bizim iştirakımızın digər mənbələrdən əlavə vəsaitin cəlb edilməsinə səbəb olmasındadır",- nümayəndəlik rəhbəri dəqiqləşdirib.
Məqalə müəllifinin əlaqə ünvanı: [email protected]
