Azərbaycan, Bakı, 18 fevral/ " müxbir İ.Xəlilova/ Azərbaycan Avropa Qonşuluq Siyasəti (ENPİ) çərçivəsində, SIGMA (Support for Improvement Government and Management) proqramına qoşulub. Bu barədə bazar ertəsi Avropa İttifaqının texniki yardım proqramlarının (TACİS) koordinasiya bürosunun icraçı direktoru Rüfət Məmmədov məlumat verib.
Bu proqram Avropa Komissiyası və İqtisadi Əməkdaşlıq və İnkişaf Təşkilatı ilə birgə implementasiya edilir. Onun büdcəsi hələ müəyyən edilməyib.
"O, proqramın Azərbaycan üçün perspektivli istiqamətləri üzrə tanışlıq və Azərabaycan hökuməti ilə danışıqlardan sonra müəyyən ediləcək", - Məmmədov bildirib.
Bu məqsədlə fevralın sonunda proqramın direktoru Bob Bon Vitin Bakıya səfəri gözlənilir.
SİGMA proqramı altı istiqaməti əhatə edir: islahat proqramlarının dizaynı və implementasiyası, xarici audit, maliyyə nəzarəti, qanunvericilik, dövlət xidməti və ədliyyə, dövlət xərclərinin idarə edilməsi və dövlət alqıları.
SİGMA 1992-ci ildə Mərkəzi və Şərqi Avropa ölkələri üçün təsis edilib. Onun əsas məqsədi bu ölkələrdə dövlət idarəetmə sisteminin təkmilləşdirilməsidir. Azərbaycan bu proqramda birinci dəfədir ki, iştirak edir. Belə ki, ENP çərçivəsində Azərbaycan üçün milli plan Aİ-Azərbaycan Əməkdaşlıq Şurasının 2006-cı il noyabrın 14-də Brüsseldə keçirilən iclasında təsdiq edilib.
