KFH Azərbaycanda investisiya şirkətinin yaradılmasına başlayır

Azərbaycan, Bakı, 05 may / Trend , müxbir İ.Xəlilova/ Küveyt Maliyyə Evi (Kuwait Finance House) "Azərbaycan investisiya şirkəti" (AİŞ) SC ilə birgə investisiya strukturunun qeydiyyatı üçün mayın ortalarında Azərbaycana mütəxəssislər qrupu göndərəcək. Bu barədə AİŞ icraçı direktorunun müavini Riad Qasımov məlumat verib.

"Bu məsələlərin həllindən sonra, mayın ortalarına məsələni AİŞ Müşahidə Şurasının müzakirəsinə çıxaracağıq", - Qasımov qeyd edib.

Onun sözlərinə görə, şirkətin kapitalı birinci iki il ərzində $20 mln. məbləğində formalaşdırılacaq. AİŞ-in iştirak payı isə $5 mln. təşkil edəcək. Qalan vəsait isə Küveyt Evi tərəfindən yatırılacaq.

Bununla yanaşı, KFH ilə layihələr üzrə iş aparılır. AİŞ direktoru müavini perspektivli layihələrin çox olduğunu hesab edir. Lakin, islam strukturularının iş xüsusiyyəti nəzərə alınmaqla, onların nəzərdən keçirə bilməyəcəkləri layihələr də var.

İslam strukturları həmişə kənd təsərrüfatı, infrastruktur, loqistika, nəqliyyat sahələrindəki layihələrdə maraqlı olublar. Küveyt Maliyyə Evi ilə də daha çox bu istiqamətlərdə işləmək planlaşdırılır.

AİŞ layihələrdə minoritar səhmdar kimi çıxış etmək niyyətindədir. Azərbaycana əsas kapital isə əcnəbi investordan gələcək. AİŞ və KFH arasında birgə Fondun 2007-ci ilin mayında imzalanan niyyətlər haqqında memorandum əsasında yaradılması nəzərdə tutulur. Bu Fond vasitəsilə Azərbaycanda birgə investisiya layihələri reallaşdırılacaq.

Razılaşmaya əsasən, AİŞ yeni təşkilatın səhmlərinin 25, KFH isə 75 faizini almağı planlaşdırır. Memorandumda nəzərdə tutulan tədbirlərin həyata keçirilməsi nəticəsində, Azərbaycanda investisiya iqliminin inkişafı və daha çox biznes-layihələrin reallaşdırılması üçün şərait yaradılacaq.

Mayın 5-ə olan rəsmi məzənnə 0,8287 AZN/USD

Müəlliflə əlaqə saxlamaq üçün elektron ünvan: capital@trend.az