Azərbaycan, Bakı, 19 may / Trend , müxbir İ.Xəlilova/ Yaxın iki-üç ildə Azərbaycan və Türkmənistan arasında mal dövriyyəsi $500 mln.-dək arta bilər və buna nail olmaq üçün hökumətlərarası komissiyanın iyunda keçiriləcək görüşündə fəaliyyət tədbirlər planı müzakirə ediləcək. Bu barədə bazar ertəsi hökumətdən məlumat veriblər. Komissiyanın iclasının iyunun ortalarında Aşqabadda keçiriləcəyi gözlənilir.
Azərbaycanın İqtisadi İnkişaf Nazirliyi ilk dəfə olaraq ticarət əlaqələrinin artırılması imkanlarının müzakirəsi üçün rəsmi Aşqabadla danışıqlara qoşulmaq niyyətindədir.
"İqtisadi münasibətlərin reanimasiyasından sonra, artıq ticarət əlaqələrində irəliləyiş müşahidə olunur", - mənbə qeyd edib.
İki ölkə arasında mal dövriyyəsi iki il əvvəl $33 mln. təşkil etdiyi halda, 2007-ci ilin yekunlarına görə $90 mln.-a çatıb.
İki ölkənin münasibətləri Qurbanqulu Berdımuhammedovun Türkmənistanın yeni prezidenti seçilməsindən sonra bərpa olunub. Ötən ilin noyabrında Xəzərin statusu problemi üzrə Azərbaycanın nümayəndəsi Xələf Xələfov bu dövr ərzində ilk dəfə olaraq Aşqabada baş çəkib və ikitərəfli münasibətlərin inkişafını müzakirə edib. 2008-ci ilin yanvarında iqtisadi və humanitar əməkdaşlıq üzrə Azərbaycan-Türkmənistan hökumətlərarası komissiyanın birinci iclası keçirilib, martda Türkmənistan Baş nazirinin müavini Xıdır Saparalıyev və Rəşid Meredovun (xarici işlər naziri) Bakıya səfəri baş tutub.
Komissiyada ticarət-iqtisadi əməkdaşlıq, nəqliyyat, rabitə, neft və qaz, ətraf mühit və humanitar sahələrdə əlaqələrin genişləndirilməsi üzrə qərarlar qəbul edilib.
İki ölkə arasında fikir ayrılıqları, əsasən, Xəzərdəki mübahisəli yataqlar ("Kəpəz", türkmən yazılışında isə "Sərdar") və dəniz sərhədinin müəyyən edilməsi, həmçinin, Azərbaycanın Türkmənistana 90-cı illərin əvvəlində yaranmış dövlət borcunun məbləği ilə bağlı kəskinləşib. Türkmənistan prezidentinin bu gün Azərbaycana səfəri ərəfəsində ölkə türkmən qazının alınmasına görə $44,8 mln. məbləğində borcu tamamilə qaytarıb.
Hökumətlərarası komissiyanın milli hissəsinin sədri Baş nazirin müavini Yaqub Eyyubov, türkmən tərəfdən həmsədr isə - Baş nazirin müavini Xıdır Saparaliyev təyin edilib. Komissiyanın milli tərkibi Azərbaycan prezidenti İlham Əliyevin 2007-ci il 20 iyun tarixli sərəncamı ilə formalaşdırılıb.
Müəlliflə əlaqə saxlamaq üçün elektron ünvan: [email protected]
