Azərbaycan, Bakı, 27 may / Trend / Azərbaycan Səhiyyə Nazirliyində 2009-2012-ci illər üçün ölkədə rabitə və informasiya texnologiyaları inkişafı Dövlət Proqramı - "Elektron Azərbaycan" üzrə təkliflərin hazırlanması üçün işçi qrupu yaradılıb.
Yaradılmış işçi qrupu qısa müddət ərzində ölkənin Rabitə və İnformasiya Texnologiyaları Nazirliyinə sahiyyə ilə bağlı yeni Dövlət Proqramında əks olunacaq konkret təkliflər və layihələr hazırlamalı və təqdim etməlidir.
Azərbaycanın Rabitə Nazirliyi yayda 2009-2012-ci illər üçün "Elektron Azərbaycan" Dövlət Proqramının ilkin variantını tamamlamağı planlaşdırır.
Proqramda Azərbaycanın sonrakı üç ili üçün rabitə və informasiya texnologiyaları sahəsində inkişaf prioritetləri əks olunacaq.
Azərbaycan rabitə və informasiya texnologiyaları ("Elektron Azərbaycan") inkişafı üzrə 2005-2008-ci illəri əhatə edən əvvəlki və ilk Dövlət Proqramı 2005-ci ilin oktyabrında prezident İlham Əliyev tərəfindən təsdiq olunub.
Dövlət Proqramı rabitə və informasiya texnologiyaları sahəsində iqtisadi-struktur islahatların aparılması, müasirləşdirilməsi və genişləndirilməsinə, informasiya cəmiyyətinə keçməsini təmin edən layihələrin hazırlanması və reallaşdırılmasına yönəlib. "Elektron Azərbaycan" Dövlət Proqramının həyata keçirilməsi üzrə tədbirlər planına iqtisadi-struktur islahatları, özəlləşdirmə, liberallaşma, tənzim, texniki modernləşdirmə, tele -radio yayımının təkmilləşdirilməsi, poçt islahatları, informasiya cəmiyyətinə keçid proqramı daxildir.
