Azərbaycan, Bakı, 29 may/ Trend , müxbir A.Bədəlova/ Dünya Bankı Azərbaycanda təşkilatların möhkəmləndirilməsi və sosial müdafiə proqramlarının təkmilləşdirilməısi yolu ilə əmək bazarının yaxşılaşdırılması və sosial müdafiə üzrə layihə üçün $26,7 mln. məbləğində krediti təsdiq edib.
Layihənin istiqamətləndiyi əsas auditoriya iş axtaran şəxslər, əmək bazarının gənc iştirakçıları, yoxsul ailələr, əlilliyinin təsdiqinə ehtiyacı olan hazırki və gələcək pensiyaçılar və əlillərdir. Layihə Azərbaycanda pensiya sistemində islahatlara da yardım göstərəcək.
"Bu layihə sosial yardımın və əmək bazarında geniş iştirakla yoxsulluğun azaldılması ilə bağlı sosial problemlərin həllində, həmçinin, dayanıqlı və səmərəli müasir pensiya sisteminin tətbiqində DB və hökumət arasında əməkdaşlığı genişləndirir", - Dünya Bankının Azərbaycan üzrə idarəçisi Qreqori Yeceyçak (Gregory Jedrzejczak) bildirib.
Layihə dörd əsas sahədə təkmilləşdirilmələrin aparılmasına yönəlib:
- əmək bazarıda islahatlar. Layihə əmək bazarı institutları, siyasəti və proqramlarının səmərəliliyini nəzərə çarpacaq dərəcədə artırmağa, həmçinin, əmək bazarı sahəsində potensialı möhkəmləndirməyə imkan verəcək;
- potensialın artırılması və sosial təhlükəsizliyin inkişafı. Layihə Əmək və Əhalinin Sosial Müdafiəsi Nazirliyində idarənin müasirləşdirilməsinə yardıma yönəlib və monitorinq və qiymətləndirmə sisteminin tətbiqini dəstəkləyəcək;
- pensiya sisteminin inkişafı. Layihə hazırki pensiya sisteminin maliyyə-büdcə dayanıqlılığının qiymətləndirilməsində, gələcəkdə onun dayanıqlılığının təmin edilməsinə yönəlmiş strategiyanın hazırlanmasında hökumətə yardım göstərəcək;
- layihənin idarə edilməsi. Bu komponent sosial müdafiənin inkişafı layihəsinin səmərəli şəkildə həyata keçirilməsi üçün Əmək və Əhalinin Sosial Müdafiəsi Nazirliyi və Dövlət Sosial Müdafiə Fondunun potensialını möhkəmləndirəcək.
Kreditlər Beynəlxalq İnkişaf Assosiasiyasının (BAİ) standart müddətində - 10 il güzəştli dövr daxil olmaqla, 35 ilədək ödəmə tarixi ilə veriləcək.
