Azərbaycan, Bakı, 30 may / Trend , müxbir Ü.İsmayılova/ Dünya Bankı tərəfindən "Azərbaycanın sosial müdafiəsinin inkişafı" layihəsinə ayrılan əlavə $1,6 mln. ölkənin təqaüd sisteminin təkmilləşdirilməsinə yönəldiləcək. Bu haqda Azərbaycanın Əmək və Əhalinin Sosial Müdafiəsi Nazirliyinin beynəlxalq əlaqələr üzrə şöbəsinin rəhbəri Elnur Sultanov cümə günü bildirib.
"Sözügedən layihə çərçivəsində, təqaüd sisteminin genişləndirilmiş inkişafına 2010-cu ildən başlanılması planlaşdırılır", - deyə Sultanov bildirib.
Dünya Bankının Direktorlar Şurası çərşənbə axşamı "Azərbaycanın sosial müdafiəsinin inkişafı" layihəsini təsdiq edib və güzəştli kreditin həcmini $20 milyondan. $26,7 milyonadək artırıb. Bununla əlaqədar, layihənin dəyəri $47,4 mln. $54,6 mln-a artaraq, həmçinin dəyişikliyə məruz qalıb. Sazişə görə, bankın kreditləri Beynəlxalq İnkişaf Assosiasiyasının (BAİ) şərtləri əsasında (10 il güzəştli dövr və 0,75 illik faiz daxil olmaqla, 35 ilədək ödəmə tarixi ilə veriləcək).
Layihə dörd komponentdən ibarətdir: əmək bazar sisteminin tam müasirləşdirilməsi, həmçinin, əmək qanunvericiliyinin, əmək mühafizə sisteminin, məşğulluq xidməti işinin təkmilləşdirilməsi; sosial təminat sistem siyasətinin formalaşdırılması; təqaüd sisteminin müasirləşdirilməsi və layihənin idarə edilməsi.
Layihə çərçivəsində peşə təhsili sisteminin tam institutlaşdırılması və müasirləşdirilməsi, Avropa təcrübəsi əsasında peşakar təsnifatçıların hazırlanması nəzərdə tutulub. Nazirliyin nəzdində peşəkar tədris mərkəzinin yaradılacağı ehtimal olunur.
Layihə, reallaşma dövrü daxil olmaqla, beş ilə hesablanıb - 2008-2013-ci illər.
DB sosial sektorda bir layihəni artıq maliyyələşdirib. 2005-ci ildən "Təqaüd islahatları və sosial təminat" layihəsi reallaşdırılır. Bu layihəyə bank tərəfindən $10 mln. ayırılıb.
Müəlliflə əlaqə saxlamaq üçün elektron ünvan: [email protected]
