Azərbaycan, Bakı, 02 avqust/ Trend , müxbir E.İsmayılov/ 2012-ci ilədək Bakı Metropoliteni metronun yeni deposunu istismara verməyi planlaşdırıb, - şənbə günü Bakı Metropoliteninin rəhbəri Tağı Əhmədov deyib. Yeni depo yeddinci mikrorayon ərazisində yerləşəcək.
Metropolitendən öncədən bildiriblər ki, cari ilin üçüncü rübündə yeni deponun tikintisi üzrə işlərə başlamaq planlaşdırılıb. Yeni deponun tikintisi bu rayonda qəbiristanlıq və yaşayış evlərinin yerləşməsi səbəbindən uzun prosesdir. Buna görə də tikintiyə başlamazdan əvvəl bütün bu obyektlərin köçürülməsi üzrə işlərin görülməsi lazımdır.
"Metronun yeni "Azadlıq prospekti" stansiyasının istismara verilməsi 2009-cu ilin dekabrına planlaşdırılıb", - Əhmədov bildirib. Metro stansiyası səkkizinci mikrorayonda (Bakının Binəqədi rayonu) yerləşəcək.
Yaxın vaxtlarda ventilyasiya kamerasının tikinisinə başlanılmalıdır. Birinci, ikinci vestibülün və platformanın tikintisi üzrə işlər artıq başa çatıb. Metronun yeni stansiyası qollara ayrılan yollar üzrə (bu stansiyalarda qatarlar dönərək, əks istiqamətdə hərəkət edəcəklər) olacaq. Bu barədə metronun əvvəllər verdiyi məlumatlarda deyilib.
Bakı Metropoliteni "İçəri Şəhər" stansiyasından "Nəriman Nərimanov" stansiyasınadək arada olan üç stansiya ilə 1967-ci ildən fəaliyyət göstərir. Metropolitenin yeddi stansiyası ("İçəri Şəhər", "Sahil", "28 may", "Cəfər Cabbarlı", "Xətai", "Nizami", "Elmlər Akademiyası") dərin enişli, Bakmil - yerüstü, qalanları isə sütunlu və dayaz enişlidir (cəmi 20 stansiya).
