Azərbaycan, Bakı, 02 avqust/ Trend , müxbir A.Bədəlova/ Britaniyanın iqtisadi araşdırmalar üzrə konsaltinq şirkəti Capital Economics-in proqnozlara görə, 2009-cu ilin sonuna Avrozonada inflyasiyanın səviyyəsi iki faizdən çox azalacaq.
Capital Economics-in Avropa üzrə analitiki Ben Mey (Ben May) Trend -a bildirib ki, 2008-ci ilin ikinci yarısında enerji daşıyıcıları və ərzaq qiymətləri üzrə inflyasiyanın zəifləməsi Avrozonada istehlak qiymətləri indeksinin kəskin yavaşımasına səbəb olacaq.
"2009-cu ilin sonuna baza indeksi bir faizdən çox azala bilər", - Mey söyləyib.
"Eurostat" statistika bürosunun ilkin məlumatlarına əsasən, 2008-ci ilin iyulunda Avrozonaya daxil olan 15 ölkədə inflyasiyanın səviyyəsi illik hesablamada yeni tarixi maksimuma - 4,1 faizə çatıb. İyunda istelak qiymətlərinin artımı mayda 3,7 faizə qarşı 4 faiz təşkil edib.
Britaniya şirkətinin proqnozlarına görə, enerji daşıyıcıları və ərzaq qiymətləri üzrə inflyasiyanın zəifləməsi nəticəsində 2009-cu ilin martına inflyasiyanın səviyyəsi 3 faiz, 2009-cu ilin sonuna isə 2 faizədək azalacaq.
Britaniya şirkəti 2009-cu ilin əvvəlinə enerji daşıyıcılarının qiymətinin 1 barelə görə $100-dan aşağı düşəcəyini proqnozlaşdırır.
"Enerji daşıyıcıları qiymətlərinin inflyasiyası onların qiymətlərinin azalması nəzərə alınmaqla, cari lin sonunda kəskin azalacaq. Biz 2009-cu ilin martına enerji daşıyıcıları qiymətləri üzrə inflyasiyanın 7 faizədək azalacağını gözləyirik", - Mey bildirib.
Gələn həftə baş verəcək əsas hadisələr ABŞ-ın Federal Ehtiyat Sisteminin (FES) və Avropa Mərkəzi Bankının (AMB) müvafiq olaraq avqustun 5 və 7-də keçiriləcək iclasları olacaq. Analitiklər AMB-nin uçot dərəcəsini dəyişmədən 4,25 faiz səviyyəsində saxlayacağı fikrindədirlər.
Capital Economics-in proqnozlarına görə, AMB faiz dərəcəsini yalnız 2009-cu ilin əvvəlində azaldacaq.
"AMB əmək haqqının zəif artımı və pul dövriyyəsi artımının zəifləməsinin təsiri altında gələn ilin əvvəlində uçot dərəcəsini azaltmağa başlayacaq", - Mey söyləyib.
AMB iyulun sonunda keçirilən iclasında baza faiz dərəcəsini 0,25 faiz - 4,25 faizədək azaldıb. FES-in baza faiz dərəcəsi hazırda 2 faizdir.
Müəlliflə əlaqə saxlamaq üçün elektron ünvan: [email protected]
