Azərbaycan, Bakı, 20 avqust/ Trend , müxbir İ.Xəlilova/ Azərbaycanın İqtisadi İnkişaf Nazirliyi 2008 - ci ilin sonuna inflyasiyanın artım templərini proqnozlaşdırmaqdan imtina edir.
"Yay mövsümü ilə əlaqədar Azərbaycanda inflyasiyanın artım templəri digər ölkələrlə müqayisədə azalır. Azərbaycanda inflyasiya göstəricisi dörd-altı il əvvəlki istehlak qiymətləri səviyyəsi ilə müqayisə olunursa, digər ölkələrdə 30 il əvvəlki dövrdən söhbət gedir", - ölkənin iqtisadi inkişaf naziri Heydər Babayev bildirib.
O hesab edir ki, ilin sonuna inflyasiya səviyyəsini yalnız doqquz ayın yekunu üzrə proqnozlaşdırmaq olar. Bununla yanaşı, o güman edir ki, İİN-in tendensiyalar əsasında formalaşan proqnozları düzgündür. 2008 - ci ildə inflyasiya gözləmələri 13-14 faiz səviyyəsində müəyyən edilib.
Lakin bu gün Azərbaycanda inflyasiyanın artım templəri təxminən Beynəlxalq Valyuta Fondunun proqnozlarına yaxınlaşıb (22 faiz) və yeddi ayın yekunu üzrə 20,9 faiz təşkil edib.
Dövlət Statistika Komitəsinin rəhbəri Arif Vəliyev hesab edir ki, 2008 - ci ilin sonunadək inflyasiya göstəricisi kiçik fərqlə dəyişəcək. Onun rəyinə görə, iyul və ya avqustda deflyasiya müşahidə olunarsa, bu inflyasiyanın azalmasına xidmət edəcək. Yay mövsümü ərzində ilk dəfə ərzaq məhsullarının qiymətlərinin azalması müşahidə edilib və azalma 1,4 faiz olub. Lakin qeyri - ərzaq malları və xidmətlər sahəsində artım davam edib - müvafiq olaraq, 0,6 faiz və 1,5 faiz.
Antiinhisar Xidməti qiymətlərin süni şəkildə artırılması, inhisarın yaranmasına yol verməmək üçün dövri olaraq monitorinqlər keçirir ki, bu, antiinflyasiya tədbirlərinin bir hissəsidir. Məhsul idxal edildiyi halda, hökumət sahibkardan onu maya dəyərindən ucuz satmağı tələb edə bilməz. Belə ki, bu malların qiyməti dünya bazarlarında formalaşdırılır. Öz növbəsində, Azərbaycan Milli Bankı manatın möhkəmləndirilməsi yolu ilə inflyasiyanı saxlayır.
2007- ci ilin yekunları üzrə inflyasiyanın artım templəri 16,7 faiz təşkil edib.
Avqustun 20-nə cari məzənnə -- 0,8138 AZN/USD.
Müəlliflə əlaqə saxlamaq üçün elektron ünvan: cap
