Azərbaycan, Bakı, 17 oktyabr / Trend , müxbir N.İsmayılova/ Yanvar-sentyabrın yekunları üzrə Azərbaycanda orta aylıq əmək haqqının ölçüsü 256,9 manat təşkil edib ki, bu da ötən ilin analoji dövrü üzrə göstəricidən 23,1 faiz çoxdur, Dövlət Statistika Komitəsindən cümə günü bildiriblər.
Ən yüksək əmək haqqı hasilat sənayesində, maliyyə xidməti, daşınmaz əmlakla əməliyyatlar, icra sahəsində xidmətlərin göstərilməsi və tikinti sektorunda qeydə alınıb.
Yanvar-sentyabrda orta aylıq əmək haqqı əhalinin adambaşına düşən orta aylıq pul gəlirlərindən 26,3 faiz çox olub.
Doqquz ay ərzində əhalinin adambaşına düşən gəlirləri 1703,8 manat təşkil edib ki, bu da 2007-ci ilin analoji dövrü üzrə göstəricisindən 34,1 faiz çoxdur. Əhalinin adambaşına düşən real pul gəlirləri 35,3 faiz artımla 1550,2 manat təşkil edib.
Yanvar-sentyabrda əhalinin nominal pul gəlirləri 14,56 mlrd. manat təşkil edib ki, bu da ötən il üzrə göstəricidən 35,6 faiz çoxdur. Bu dövr ərzində əhalinin real pul gəlirləri 36,9 faiz artımla 13,24 mlrd. manat həddinə çatıb.
Sentyabrın 17-nə olan cari mübadilə məzənnəsi --0 0,8092 AZN/USD.
Müəlliflə əlaqə saxlamaq üçün elektron ünvan: [email protected]
