Azərbaycan, Bakı, 03 noyabr/ Trend , müxbir N.İsmayılova/
Operativ məlumatlara əsasən, 2008 - ci ilin üçüncü rübünün yekunlarına görə dövlət büdcəsinin gəlir hissəsi ötən ilin analoji dövrü ilə müqayisədə, 71,3 faiz (3123 mln. manat) artaraq, 101,2 faiz yerinə yetirilib. Bu barədə bazar ertəsi ölkənin Maliyyə Nazirliyindən məlumat veriblər. Dövlət büdcəsinə 7421 mln. manat proqnoza qarşı 7506,6 mln. manat köçürülüb.
Büdcə daxilolmalarının əsas hissəsi (57,9 faiz və ya 4346,5 mln. manat) proqnozu 107,4 faiz yerinə yetirən Vergilər Nazirliyi tərəfindən təmin edilib. Dövlət büdcəsinə vergi ödəmələri 34,1 faiz (1104,9 mln. manat) artıb.
Dövlət Gömrük Komitəsi 845,5 mln. manat (11,2 faiz) ödəyərək proqnozu 100,4 faiz yerinə yetirib ki, bu da ötən ilin müvafiq dövründəki ödəmələrdən 47,1 faiz çoxdur. Dövlət Neft Fondundan transfertlər 3,5 dəfə artaraq 2190 mln. manat (29,2 faiz) təşkil edib. Dövlət təşkilatlarının büdcədənkənar ödəmələrindən xəzinəyə 88,4 mln. manat (1,2 faiz), digər mənbələrdən 36,2 mln. manat (0,5 faiz) daxil olub. Dövlət Əmlakının Idarə Edilməsi üzrə Dövlət Komitəsi 3,9 mln. manat ödəyib ki, bu da 2007-ci ilin üçüncü rübündən 77,3 faiz çoxdur.
Dövlət büdcəsinin məxaric hissəsi 85,3 faiz yerinə yetirilərək, 7876,6 mln. manat həcmində proqnoza qarşı 6 719,2 mln. manat təşkil edib. Dövlət büdcəsinin məxaric maddələri yerinə yetirilməsə də, ötən ilin analoji dövrü ilə müqayisədə, büdcə xərcləri 68,6 faiz (2733,3 mln. manat) artıb.
Sənaye, tikinti və faydalı qazıntılara xərclər 2967,1 mln. manat (artım 2,3 dəfə), nəqliyyat və rabitə - 57mln. manat (10,9 faiz), sosial müdafiə və təminat - 617,5 mln. manat (34,4 faiz), mədəniyyət, incəsənət, bədən tərbiyəsi - 90,6 mln. manat (44,5 faiz), mənzil - kommunal təsərrüfatı - 100,9 mln. manat (87,9 faiz), səhiyyə - 205 mln. manat (37,7 faiz), təhsil - 600,9 mln. manat (21,9 faiz), kənd təsərrüfatı, balıqçılıq, ətraf mühitin mühafizəsi - 199,3 mln. manat (30,3 faiz), müdafiə - 675 mln. manat (24 faiz), hüquq - mühafizə və prokurorluq orqanları - 327,7 mln. manat (35,3 faiz) təşkil edib.
Üçüncü rübdə büdcə 787,4 mln. manat profisitlə yerinə yetirilib.
Noyabrın 3- nə olan cari mübadilə məzənnəsi -- 0,8087 AZN/USD.
Müəlliflə əlaqə saxlamaq üçün elektron ünvan: [email protected]
