Azərbaycan, Gəncə, 04 noyabr/ Trend , müxbir V.Məmmədov/ Azərbaycanın qərb regionunda - Gəncədə un istehsalçıları məhsulun qiymətini 7,8 - 8,8 faiz azaltmağa başlayıblar ki, bu da xarici ölkələrdə dənli bitkilərin qiymətinin ucuzlaşması ilə bağlıdır, - un istehsalı üzrə "Neon" firmasının direktoru Arif Həsənov bildirib.
Onun sözlərinə görə, Rusiya və Qazaxıstandan alınan taxılın bir tonu 315 dollara başa gəlir ki, bu da unun qiymətini 17 manatadək azaltmağa imkan verir. Həsənovun sözlərinə görə, unun qiymətinin azalması onun ixracatçı - ölkələrdə ucuzlaşması ilə bağlıdır. "Biz taxılı xarici bazarlardan almağa məcburuq. Belə ki, yerli taxılın qiymətində xüsusi azalma müşahidə olunmur", - Həsənov bildirib.
Respublikada ən iri un istehsalçısı olan Fatoğlu fabriki bu gün 50 kiloqramlıq un kisəsinin qiymətini 17,8 manatdan 16,5 manatadək azaldıb. Gəncədə un istehsal edən "Ərəboğlu" firması bir kisə unun qiymətini 18,5 manatdan 17 manatadək azaldıb. Gəncədə unun günbəgün ucuzlaşmasına baxmayaraq, bu, çörəyin qiymətinə təsir göstərmir. Bu gün şəhərdə çörəyin qiyməti, çəkisindən asılı olaraq, 0,3-0,4 manat civarında dəyişir.
Noyabrın 4 - nə olan cari mübadilə məzənnəsi -- 0,8097AZN/USD.
Müəlliflə əlaqə saxlamaq üçün elektron ünvan: [email protected]