Azərbaycan, Bakı, 06 noyabr/ Trend , müxbir İ.Xəlilova/ Azərbaycan hökumətinin 2009 - cu il üzrə makroiqtisadi proqnozlarına əsasən, inflyasiyanın artım templərinin, orta hesabla, 12-14 faiz səviyyəsində olacağı gözlənilir, - iqtisadi inkişaf naziri Şahin Mustafayev cümə axşamı parlamentin beş daimi komissiyasının birgə iclasında 2009 - 2012 - ci illərin büdcə paketinin müzakirəsində bildirib.
"İstehlak qiymətlərinə ciddi xarici təsir olmasa, büdcə xərclərinin artım templərinin azalması, maliyyə bazarının tənzimlənməsi, antiinflyasiya tədbirlərinin gücləndirilməsi, istehlak qiymətlərinin yeni artımının qarşısının alınması ilə bağlı olaraq belə proqnozlara nail olmaq mümkün olacaq", - nazir bildirib.
Onun sözlərinə görə, qarşıdakı üç ildə inflyasiyanın artım templəri birrəqəmli səviyyəyə çatdırılacaq.
2008 - ci ilin doqquz ayı ərzində istehlak qiymətləri indeksi illik hesablamada 21,5 faiz təşkil edib. Mustafayevin sözlərinə görə, əhalinin gəlirlərinin artımı inflyasiyanı 14,1 qabaqlayaraq, 35,6 faiz təşkil etsə də, bu rəqəm narahatlıq doğurur.
"Aparılmış tədqiqatlar göstərib ki, 2008 - ci ilin birinci yarısında inflyasiyaya təzyiqin artması dünya əmtəə bazarlarında qiymətlərin, xüsusilə də ərzağın qiymətinin kəskin artması ilə bağlıdır", - nazir bildirib.
Mustafayev hesab edir ki, son aylarda dünya bazarlarında konyuktura dəyişib və bu, ilin əvvəli ilə müqayisədə, digər amillərlə birlikdə inflyasiyanı 2-3 faiz azaltmağa imkan verib. 2008 - ci ilin sonuna inflyasiyanın 20 faiz səviyyəsində olacağı gözlənilir.
Müəlliflə əlaqə saxlamaq üçün elektron ünvan: [email protected]
