Azərbaycan, Bakı, 07 noyabr/ Trend , müxbir A.Bədəlova/ ABŞ-da iqtisadi vəziyyətin möhkəmləndirilməsi seçilmiş prezident Barak Obamanın birinci dərəcəli vəzifəsi olacaq, - ABŞ-ın Heritage Foundation Tədqiqat İnstitutunun Asiya məsələləri üzrə baş əməkdaşı, ABŞ-ın Honkonq, Tayvan və Yaponiyadakı keçmiş səfiri Xarvi Feldman (Harvey Feldman) hesab edir.
"2009-cu il yanvarın 20-də öz səlahiyyətlərinin icrasına başladıqdan sonra Obamanın ən vacib vəzifəsi ABŞ iqtisadiyyatının yaralarının sağaldılması və bərpası olacaq", - Feldman cümə günü elektron poçtla Trend -a bildirib.
Demokrat-senator Barak Obama ABŞ tarixində prezident seçkilərində qələbə qazanmış ilk afroamerikalı prezident olub. Si-Bi-Es telekanalının məlumatlarına əsasən, o, 349 seçicinin dəstəyini qazanıb (seçilmək üçün zəruri olan minimum - 270 səs). Onun rəqibi - respublikaçı-senator Con Makkeyn 163 seçici səsi toplayıb.
Feldman hesab edir ki, yeni prezidenti ABŞ-ın iqtisadi vəziyyətinin yaxşılaşdırılması ilə yanaşı xarici siyasi kursa da xeyli diqqət yetirməlidir.
"Heç bir prezident dünyadakı vəziyyətə etinasızlıq göstərə bilməz və xüsusilə də, ABŞ-ın İraq və Əfqanıstanla müharibə vəziyyətində olmasına; Pakistanda vəziyyətin pisləşdiyi və İsrail-Fələstin sazişinin əldə edilməsinə dair ümidlərin praktiki olaraq sıfıra endiyi vaxtda", - Feldman bildirib.
Feldmanın rəyinə görə, ritorika dəyişsə də, heç bir sürətli və əhəmiyyətli dəyişikliklər olmayacaq.
Digər ölkələrlə iqtisadi əməkdaşlıq məsələsinə gəldikdə isə, Feldmanın sözlərinə görə, bu ölkənin gərgin iqtisadiyyatının sağaldılması üçün son dərəcə zəruridir.
"Tamamilə aydındır ki, biz iqtisadiyyatların bir-biri ilə sıx bağlı olduğu, iri iqtisadiyyatlardan birindəki problemlərin digərlərinə yayıldığı dünyada yaşayırıq. Bu halda hansısa bir ölkənin yalnız ona kömək edərək başqalarına zərbə vuracaq siyasi qərar qəbul etməməsi xüsusilə vacibdir. Son nəticədə onlar də zərbəni hiss edəcəklər", - Feldman bildirib.
Onun əsas şüarı "Dəyişikliklər" sözüdür. Obama prezident seçildiyi halda qoşunları İraqdan çıxarmağı vəd edirdi. Onun vitse-prezidenti təcrübəli siyasətçi, Delaver Ştatından ABŞ senatoru Cozef Bayden olacaq.
Obama 1961-ci il avqustun 4-də anadan olub. O, Kolumbiya Universiteti və Harvard Hüquq Elmləri İnstitutunun məzunudur. Harvardda "Harvard Law Review" jurnalının redaktoru oldub. Obama vətəndaş hüquqları üzrə vəkil işləyib.
Müəlliflə əlaqə saxlamaq üçün elektron ünvan: [email protected]