Azərbaycan, Bakı, 14 noyabr/ Trend , müxbir N.İsmayılova/ Azərbaycan prezidenti İnzibati Xətalar Məcəlləsinə dəyişiklikləri təsdiq edib.
Düzəlişlərə əsasən, Qanunda, Qanuna müvafiq olaraq, bank lisenziyasında qadağan olunmuş və ya bankın fəaliyyəti dövründə məhdudlaşdırılmış, yaxud dayandırılmış fəaliyyətin həyata keçirilməsinə görə, hüquqi şəxslər 35 min manatdan 40 min manatadək miqdarda cərimə ediləcək. (Maddə 223-5).
Bank fəaliyyətinə dair prudensial normativlərin və tələblərin pozulması aşkar edildikdə, həmin pozuntunun aradan qaldırılması barədə Azərbaycan Milli Bankının göstərişinin vaxtında icra edilmədiyinə görə, vəzifəli şəxslər 2 min manatdan 2,5 min manatadək miqdarda, hüquqi şəxslər 15 min manatdan 20 min manatadək miqdarda cərimə ediləcək. (Maddə 223-6.1). Azərbaycan Milli Bankının Qanuna uyğun olaraq verdiyi digər göstərişinin vaxtında icra edilmədiyinə görə isə, vəzifəli şəxslər 1,5 min manatdan 2 min manatadək miqdarda, hüquqi şəxslər 10 min manatdan 15 min manatadək miqdarda cərimə ediləcək. (Maddə 223-6.2)
Banka aidiyyəti olan şəxslərlə və ya aidiyyəti olan şəxs adından hərəkət edən şəxslərlə əməliyyatların aparılması qaydalarının pozulmasına görə, vəzifəli şəxslər 2 min manatdan 2,5 min manatadək miqdarda, hüquqi şəxslər 15 min manatdan 20 min manatadək miqdarda cərimə ediləcəklər. (Maddə 223-7).
Bank statistikası hesabatlarının AMB -yə təqdim edilməməsinə, yaxud vaxtında, tam və ya düzgün təqdim edilməməsinə görə, vəzifəli şəxslər 200 manatdan 300 manatadək miqdarda, hüquqi şəxslər min manatdan 1,5 min manatadək miqdarda cərimə olunacaqlar. (Maddə 223-8.1).
Bank və ya xarici bankın yerli filialı tərəfindən prudensial və ya maliyyə hesabatlarının A MB - yə təqdim edilməməsinə, yaxud vaxtında, tam və ya düzgün təqdim edilməməsinə görə, vəzifəli şəxslərə 1,5 min manatdan 2 min manatadək miqdarda, hüquqi şəxslərə 10 min manatdan 15 min manatadək miqdarda cərimə tətbiq ediləcək. (Maddə 223-8.2).
Mərkəzləşdirilmiş kredit reyestrinə qanunvericiliklə müəyyən olunmuş qaydada məlumatların tam, düzgün və ya vaxtında təqdim edilməməsinə görə, vəzifəli şəxslər 500 manatdan 700 manatadək miqdarda, hüquqi şəxslər 5 min manatdan 7 min manatadək miqdarda cərimə ediləcəklər. (Maddə 223-9).
341-2 maddəsinə də dəyişiklik edilib. Düzəlişə əsasən, qanunvericiliklə nəzərdə tutulmuş hallar istisna olmaqla, Azərbaycan Respublikasında xarici dövlətlərin və beynəlxalq təşkilatların bayraqlarının qaldırılması və ya yerləşdirilməsinə görə, fiziki şəxslərə 10 manatdan 30 manatadək miqdarda, vəzifəli şəxslər üçün 30 manatdan 40 manatadək miqdarda, hüquqi şəxslər üçün 70 manatdan 100 manatadək miqdarda cərimənəzərdə tutulub.
Noyabrın 14-nə olan rəsmi məzənnə 0,8093 AZN/USD təşkil edir.
Məqalə müəllifi ilə əlaqə ünvanı - [email protected]
