Azərbaycan, Bakı, 18 noyabr / Trend müxbir E.İsmayılov/ "İlin sonunadək Bakıya Ukrayna istehsalı olan "Boqdan" markalı 100 yeni sərnişin avtobusu gətiriləcək", - çərşənbə axşamı Ukraynanın Azərbaycandakı səfiri Boris Klimçuk deyib.
"Bakıya artıq 170 avtobus daxil olub, ilin sonunadək biz daha 100 avtobusun gətiriləcəyini gözləyirik", - diplomat söyləyib.
Onun sözlərinə görə, Azərbaycanın Nəqliyyat Nazirliyi "Boqdan" markalı avtobuslar üçün onların istifadəsinin məqsədəuyğun sayıldığı ərazilərdə "yaşıl işıq yandırıb".
Oktyabrın 10 - da 37 - 31 Daewoo və altı MAN markalı yeni avtobusun (Almaniya) təqdimatı keçirilib. Bu avtobuslar artıq marşruta buraxılıb. Əvvəllər Nəqliyyat Nazirliyinin aldığı 60 yeni sərnişin avtobusu - 40 ədəd MAN markalı və 20 ədəd MAZ (Belarus) da istifadəyə verilib.
Nəqliyyat sistemində iri avtobusların daxil edilməsi Nəqliyyat Nazirliyinin Bakının mərkəzi küçələrində aztutumlu avtobuslardan istifadəyə qadağa qoyması ilə bağlıdır. Aztutumlu avtobuslar ikinci dərəcəli marşrutlardan və yollardan istfiadə edə bilərlər. Onların şəhər kənarında və Bakının mərkəzi küçələrində hərəkəti hələlik qadağan olunub.
Müəlliflə əlaqə ünvanı: [email protected]
