Azərbaycan, Gəncə, 18 noyabr/ Trend , müxbir V.Məmmədov/ "Gəncəyə dəyəri 350-700 manat civarında olan yeni diyircəkli zibil qutuları gətirilib", - deyə çərşənbə axşamı Şəhər Təmizlik İdarəsinin rəisi Nizami Babayev bildirib.
Gəncə üçün 300 ədəd belə zibil qutusu sifariş verilib və artıq onlardan 66 ədədi gətirilib.
Babayevin sözlərinə görə, yeni zibil qutularının cəlb edilməsi, məişət tullantılarının daşınması üçün Gəncəyə gətirilən Almaniya və Türkiyənin birgə istehsalı olan MAN markalı avtomobillərdən istifadə ilə problemi aradan qaldıracaq.
"Bu avtomobillər şəhərdə olan köhnə zibil qutularını istifadə edə bilmirdi. Məhz buna görə də, yeni avtomobillərdən istifadə edə bilmirdik", - deyə idarə rəhbəri bildirib.
Mənzil Kommunal Təsərrüfatı Birliyinin sifarişi ilə tutumu 0,8 və 1 kubmetrlik zibil qutuları alınıb. Babayevin sözlərinə görə, bu qutular həm keyfiyyətinə, həm də tutumuna görə çox sərfəlidir.
Yeni avtomobillər yeni gətirilən 90 zibil qutusunu yığıb daşıya bilir.
Hər avtomobilin dəyəri 210 min manatdır. Babayevin sözlərinə görə, bir MAN markalı avtomobil 4 ədəd QAZ 53 manipulyatolrlu avtomobilin işini görür.
Noyabrın 18-nə olan rəsmi məzənnə 0,8094 AZN/USD təşkil edir.
Məqalə müəllifi ilə əlaqə ünvanı - [email protected]
