Azərbaycan, Bakı, 18 noyabr/ Trend , müxbir Ü.İsmayılova/ Oktyabrda Bakının təkrar daşınmaz əmlak bazarında bir kvadratmetr mənzil sahəsinin qiyməti sentyabra nisbətən 2,7 faiz - 1582 dollaradək azalıb, - "Əmlak Bazarı İştirakçıları" İctimai Birliyindən çərşənbə axşamı bildiriblər.
"Oktyabrda bazardakı orta qiymətlər ilin əvvəlində olan səviyyəyədək enib", - təşkilatdan bildiriblər.
Oktyabrda qiymət artımı Bakının üç rayonunda - Nəsimi, Suraxanı və Qaradağ rayonlarında müşahidə edilib, qalan rayonlarda mənzillərin qiymətləri azalıb.
Təkrar mənzil bazarında orta qiymətindən aşağı satılmış mənzillər portfelin böyük hissəsini təşkil edib - 64 faiz. Oktyabrda orta otaq göstəricisi 2,39 olub (-3,6 faiz).
Oktyabrda Bakının təkrar bazarında bir otağın qiyməti 56,7 min dollar (+2,8 faiz), mənzilin orta qiyməti - 135,5 min dollar (-0,9 faiz) təşkil edib.
Oktyabrda təkrar mənzil bazarında mənzillərin sayına tələbatda dəyişikliklər baş verib. Belə ki, bazarın portfelində üçotaqlı mənzillərin payı 36,8 faiz, ikiotaqlı - 35,8 faiz təşkil edib.
Portfelin böyük hissəsini Bakının Yasamal (23 faiz) və Nərimanov (20,2 faiz) rayonlarındakı tikililər təşkil edib.
Son aylarda təkrar bazarda mənzillərin alqı - satqısı üzrə bağlanılmış müqavilələrin sayı 20,7 faiz azalıb.
Monitorinqin nəticələrinə əsasən, son üç ayda təkrar bazarda davam edən passivlik ən yüksək həddə çatıb və bununla əlaqədar mənzilin ekspozisiya müddəti 81 günədək artıb.
Müəlliflə əlaqə saxlamaq üçün elektron ünvan - [email protected]
