Azərbaycan, Bakı, 21 noyabr/ Trend , müxbir Ü.İsmayılova/ Bu gün, ilk dəfə olaraq Bakıda keçirilmiş Mərkəzi Asiya Regional İqtisadi Əməkdaşlıq (CAREC) Proqramı üzrə nazirlər konfransında Mərkəzi Asiya və qonşu dövlətlərdə nəqliyyat, ticarətə yardım, ticarət siyasəti və energetika sahəsində regional əməkdaşlığın dərinləşdirilməsi məqsədilə ambisiyalı planları ortaya qoyan strategiyalar təsdiq edilib.
Nəqliyyat və ticarətə yardım sahəsində strateji fəaliyyət planı 2017-ci ilə CAREC-də iştirak edən dövlətlərdəki altı nəqliyyat və ticarət dəhlizinin beynəlxalq standartlara uyğun müasirləşdirilməsi üçün 21 mlrd. dollar sərmayənin yatırılmasını nəzərdə tutur.
Ticarət siyasəti üzrə strateji fəaliyyət planı CAREC ölkələrinin Ümumdünya Ticarət Təşkilatına daxil olması üzrə səylərini dəstəkləyir. Fəaliyyət planı ticarətə yardım edəcək və bütün Mərkəzi Asiyada ticarət rejimlərini liberallaşdıraraq və sadələşdirərək, sərmayə mühitini yaxşılaşdıracaq.
Enegetika sektorunda regional əməkdaşlıq strategiyası enerji ehtiyatları ilə ticarətin genişləndirilməsi, səmərəlilik və təhlükəsizliyin yaxşılaşdırılması məqsədilə əməkdaşlığa yardım edəcək.
CAREC Proqramının başlıca məqsədi iqtisadi artım templərinin artması və yoxsulluğun azaldılması, ticarətin genişlənməsi və diversifikasiyası və regional əməkdaşlıq və inteqrasiya potensialının gücləndirilməsi məqsədini güdən regional əməkdaşlıq vasitəsilə inkişafdır.
Mərkəzi Asiya İqtisadi Əməkdaşlığı proqramı AİB-in təşəbbüsü ilə 1998-ci ildə təsis edilib.CAREC - səkkiz iştirakçı dövlətin (Əfqanıstan, Azərbaycan, ÇXR, Qazaxıstan, Qırğızıstan, Monqolustan, Tacikistan və Özbəkistan) və altı beynəlxalq təşkilatın (AIB, AYİB, BVF, İİB, BMT İnkişaf Proqramı və Dünya Bankı) tərəfdaşlığıdır.
Müəlliflə əlaqə saxlamaq üçün elektron ünvan: [email protected]
