Azərbaycan, Bakı, 24 noyabr/ Trend , müxbir Ü.İsmayılova/ "Dünya maliyyə böhranının Azərbaycanın sığorta bazarına birbaşa təsiri gözlənilmir", - ", - Azərbaycan Maliyyə Nazirliyi Dövlət Sığorta Nəzarəti Şöbəsinin rəhbəri Namiq Xəlilov bazar ertəsi bildirib.
"Azərbaycanda yalnız girov əmlakının [avtomobilin] sığortalanmasında öz əksini tapmış maliyyə böhranının daha konkret təsiri yalnız dördüncü rübün yekunları üzrə müəyyən olunacaq", - Xəlilov vurğulayıb.
Azərbaycanın əksər bankları dünya maliyyə böhranının təsiri ilə avqustda avtomobil alqısına kreditlərin verilməsini dayandırıblar ki, bu da ölkənin sığorta bazarına təsir göstərib. Bazar iştirakçılarının rəyinə görə, respublikada avtomobillərin 80 faizi bank kreditləşdirməsi vasitəsilə satılır ki, bu da sığorta şirkətlərinin sığorta haqlarının həcminin xeyli azalmasına təsir göstərib.
Xəlilovun sözlərinə görə, hətta bu halda, Azərbaycanın sığorta şirkətlərinin antiböhran tədbirlərinin görülməsi üçün kifayət qədər imkanları var və Azərbaycan Maliyyə Nazirliyinin xüsusi dəstəyinə ehtiyacı yoxdur.
Lakin yaranmış vəziyyətlə əlaqədar, ölkədə sığorta həcminin azalacağı gözlənilir.
"2007-ci ildə sığorta bazarının artım templəri 60 faiz, 2008-ci ilin doqquz ayının yekunları üzrə 45 faiz təşkil edib. İllik hesablamada daha aşağı rəqəm gözlənilsə də, müqayisəli göstəricidə bu, kiçik artım deyil", - Xəlilov bildirib.
Azərbaycanda 28 sığorta və bir təkrarsığorta şirkəti fəaliyyət göstərir. Yanvar-sentyabrda sığorta şirkətlərinin sığorta haqqları 148,7 mln. manat, ödənişləri isə 40,4 mln. manat təşkil edib.
Noyabrın 24 - nə olan cari mübadilə məzənnəsi -- 0,8089 AZN/USD.
Müəlliflə əlaqə saxlamaq üçün elektron ünvan: [email protected]
