Azərbaycan, Bakı, 11 dekabr/ Trend , müxbir Ü.İsmayılova/ Azərbaycanda təxminən 800 tikinti şirkəti fəaliyyət göstərir. Onların əksəriyyəti dünya maliyyə böhranı fonunda bank kreditləşdirməsinin dayandırılması ilə bağlı vəsait çatışmazlığından fəaliyyətlərini dayandırmağa başlayıb.
Trend -ın sorğu apardığı Azərbaycanın daşınmaz əmlak bazarının iştirakçıları 2009-cu il ərəfəsində öz gözləmələri barədə danışıblar.
- Caspian Property Services qiymətləndirmə şirkətinin marketinq direktoru Elnur Azadov:
- 2009 - cu ilin aprel -mayınadək Azərbaycanın daşınmaz əmlak bazarında əhəmiyyətli dəyişikliklər gözləməyə dəyməz; adətən, maliyyə böhranı beş-altı ay davam edir. Düşünürəm ki, bu dəfə də belə olacaq - maydan dünya bazarında vəziyyət sabitləşməyə başlayacaq.
Hazırda bazarda durğunluq hökm sürür. Lakin belə vəziyyətə baxmayaraq, təcili pula ehtiyacı olan mənzil sahibləri öz əmlaklarını satacaqlar. 2009-cu ilin mayından mənzil bazarı canlanmağa başlayacaq. Lakin qiymətlərdə azalma gözlənilmir. Bu dövrdə bazarda qiymət balansı baş verəcək. Dünya maliyyə böhranı sabitləşməyə başlamazsa, ola bilsin qiymətlər azalacaq.
MBA Group Konsaltinq Şirkətinin Baş direktoru Nüsrət İbrahimov:
- 2009-cu ilin ikinci yarısında Azərbaycanın daşınmaz əmlak bazarı hazırki səviyyədə qalacaq; əhəmiyyətli dəyişikliklər gözlənilmir və bu, dünya maliyyə böhranının təsiri ilə bağlıdır. Bazarın fəallığı zəif də olsa, yaya doğru artmağa başlayacaq - ayda təxminən 1,7-2 faiz. Cari ilin ikinci yarısı ilə 2009-cu ilin ikinci yarısı arasında bazarın fəallığında fərq 20 faiz təşkil edəcək. Yəni, bazar gələn ilin sonuna daim sabitləşməyə başlayacaq. İlin birinci yarısında bazarda qiymətlər tədricən düşməyə davam edəcək - ayda 1,5-2 faiz. Lakin ilin sonuna aktivliklə birlikdə qiymətlər də artmağa başlayacaq.
- "Əmlak Bazarı İştirakçıları" Ictimai Birliyinin icraçı direktoru Ramil Osmanov:
- İqtisadiyyatın digər sahələrindən fərqli olaraq, daşınmaz əmlak bazarını proqnozlaşdırmaq çətindir. Belə ki, onun inkişafı iki amildən asılıdır: sərmayələr və xüsusi satışlar. Düşünürəm ki, inkişafın sərmayədarlardan asılı olduğu ilkin bazarda vəziyyətin pisləşəcəyini gözləməyə dəyər. Azərbaycanda tikinti şirkətlərinin sayı azalmağa başlayır və bazarda yalnız rəqabətqabiliyyətlilər qalır. Təkrar bazarda, o cümlədən torpaq və kommersiya bazarında xüsusi satışlar indi heç bir şey satmayan özəl şəxslərdən asılıdır.
Maliyyə böhranının əvvəlindən Azərbaycanda tikinti 30 faiz azalıb və gələn il mənzil qiymətlərinin 10-15 faiz azalacağı mümkündür.
Müəlliflə əlaqə saxlamaq üçün elektron ünvan: [email protected]