Azərbaycan, Bakı, 17 dekabr/ Trend , müxbir S.Babayeva/ "Bu həftə Bakıda tikintisi Heydər Əliyev Fondunun təşəbbüsü ilə başlayan Talassemiya Mərkəzi istismara veriləcək", - Azərbaycanın səhiyyə nazirinin müavini Elsevər Ağayev çərşənbə günü bildirib.
2005 - ci ilin fevralında YUNESCO və İSESCO - nun Xoşməramlı Səfiri, Heydər Əliyev Fondunun prezidenti, Azərbaycanın birinci xanımı Mehriban Əliyeva "Talassemiyasız həyat naminə" Proqramını elan edib. Bakıdakı Talassemiya Mərkəzinin tikintisi bu Proqram çərçivəsində aparılıb.
"Burada yalnız talassemiya xəstələrinin deyil, digər irsi qan xəstəliklərinə yoluxanların da problemi həll olunacaq", - Ağayev deyib.
Nazir müavininin sözlərinə görə, ilk dəfə olaraq, tibb müəssisəsində onurğa beyninin köçürülməsi mərkəzi yaradılacaq. Mərkəz üçün pulsuz avadanlığı Türkiyə Cümhuriyyəti Baş naziri Aparatı yanında Türkiyə Əməkdaşlıq və İnkişaf İdarəsi (TİKA) təqdim edir. TİKA-nın yardımı ilə azərbaycanlı mütəxəssislər bu ölkədə hazırlıq keçirlər.
Azərbaycanın Səhiyyə Nazirliyi mərkəzin təchizatı üçün 3,5 mln. manat vəsait ayırıb. Bu vəsaitlər hesabına Siemens şirkətinin avadanlıqları alınıb.
Azərbaycanda rəsmi qeydiyyatdan keçmiş talassemiya xəstələrinin sayı təxminən 1 min nəfərdir.
