Azərbaycan, Bakı, 20 dekabr/ Trend , müxbir N.İsmayılova/ Azərbaycanın Dövlət Əmlakının İdarə Edilməsi üzrə Dövlət Komitəsi Ağcabədi -Pambıq Səhmdar Cəmiyyətinin səhmlərinin 29,96 faizinin satışına sərmayə müsabiqəsi elan edib, - Dövlət Komitəsindən şənbə günü bildiriblər.
Müsabiqədə Azərbaycanın fiziki və hüquqi şəxsləri və xarici sərmayədarlar iştirak edə bilərlər. İddiaçılar xam pambıq emalının təkmilləşdirilməsi və onun satış həcminin genişləndirilməsi üzrə sərmayə proqramını təqdim etməlidirlər.
Müsabiqədə iştirak etmək üçün sərmayə təkliflərinin beş faizinə bank zəmanəti və dövlət büdcəsinə 165 min manat ödəmək barədə təklifləri təqdim etmək lazımdır.
Ağcabədi-Pambıq xam pambığın emalı və satışı ilə məşğul olur. 79,99 ha ərazini tutan SC Ağcabədi şəhərində (ölkənin qərb regionunda), M.Rəsulzadə küç., 252 ünvanında yerləşib.
SC-nin Nizamnamə kapitalı 1,98 mln. manat təşkil edir. Bu məbləğdə hər birinin nominal dəyəri 2 manat olan 992159 səhm buraxılıb. Müsabiqənin predmeti nominal dəyəri 594,43 min manat olan 297 213 səhmdir.
2008-ci il noyabrın 1-nə olan vəziyyətə görə, müəssisənin 2,68 mln. manat məbləğində borcu, əmək haqqı üzrə 37,27 min manat borcu var. Müəssisənin debitor borcları 174,82 min manat təşkil edir. Xammala və göstərilmiş xidmətlərə görə ödəniş borcu 2,65 mln. manata çatır.
Müəssisə 1953-cü ildən fəaliyyət göstərir, əməkdaşlarının sayı 47 nəfərdir.
İddiaçılar 2009-cu il yanvarın 21-dək saat 10:00-17:30 ərzində Bakı şəh., Y.Səfərov küç, 20 ünvanında müsabiqənin tələbləri, sərmayə planı ilə tanış ola və əlavə məlumat ala bilərlər. Sənədlər və təkliflər 21 yanvar, saat 10:00-dan 17:30-dək qəbul olunur.
Təkliflərə 2009-cu il yanvarın 23-də saat 10:30-dan etibarən müsabiqə komissiyası tərəfindən Dövlət Əmlakının İdarə Edilməsi üzrə Dövlət Komitəsinin binasında baxılacaq.
Dekabrın 20-nə olan cari mübadilə məzənnəsi -- 0,8013 AZN/USD.
Müəlliflə əlaqə saxlamaq üçün elektron ünvan: [email protected]
