Azərbaycan, Bakı, 25 dekabr/ Trend , müxbir Ü.İsmayılova/ "Azərbaycanda beynəlxalq audit standartlarının tətbiqi nəticəsində, yerli auditor şirkətləri və "Böyük dördlüyün" [Price Waterhouse, Ernst&Young, Delloitte, KPMG] nümayəndəliklərinin göstərdiyi xidmətlərin tarifləri bir neçə dəfə fərqlənəcək", - Azərbaycan Prezidenti yanında Auditorlar Palatasının rəhbəri Vahid Novruzov bildirib.
Onun sözlərinə görə, "hazırda yerli və əcnəbi şirkətlərin xidmətləri arasında tariflərdəki fərq on dəfələrlə olsa da, yerli standartların təkmilləşdirilməsi Azərbaycan şirkətləri üçün də tariflərin yenidən nəzərdən keçirilməsi zərurətinə gətirəcək".
Beynəlxalq audit standartlarının tam tətbiqi gələn ilin üçüncü rübündə baş verəcək.
"Bütün yerli auditor şirkətlərinin beynəlxalq standartlara keçməsi məşhur beynəlxalq auditor şirkətləri ilə bir səviyyədə auditin aparılması demək olacaq", - Novruzov deyib.
Auditorlar Palatası fevralda Beynəlxalq Mühasiblər Federasiyası ilə bu sistemin tətbiqi üçün memorandum imzalayıb, - Auditorlar Palatasının rəhbəri əvvəllər bildirib. Hazırda Palatada fəal iş və bu standartların tətbiqinə hazırlıq aparılır. Hazırlıq bu standartların keyfiyyətli tərcüməsini nəzərdə tutur.
Azərbaycanın Auditorlar Palatası 1995-ci ilin sentyabrında təsis edilib, 1996-cı ilin aprelində aktiv fəaliyyətə başlayıb. 1994 - cü ildə Azərbaycanda "Auditor fəaliyyəti haqqında" Qanun qəbul olunub.
Müəlliflə əlaqə saxlamaq üçün elektron ünvan: [email protected]