Azərbaycan, Bakı, 07 yanvar/ Trend , müxbir E.İsmayılov/ Koreyanın Pyunghwa Engineering Consultants Ltd şirkəti Şamaxı - Quba avtomobil yolunun çəkilməsinin işçi layihəsinin hazırlanması üzrə işlərə başlayıb, - Azərbaycanın Nəqliyyat Nazirliyindən çərşənbə günü bildiriblər.
2008 - ci ildə şirkət bu yolun çəkilməsi layihəsinin texniki-iqtisadi əsaslandırmasını Nəqliyyat Nazirliyinə təqdim edib.
Şamaxı - Quba yolunun çəkilməsi Azərbaycan ərazisindən tranzitlə həyata keçirilən ixrac əməliyyatlarına vaxtı və xərclərin sərfini azaltmağa şərait yaradacaq və ölkə iqtisadiyyatının inkişafına təkan verəcək.
Yeni yolun uzunluğu 105,4 km təşkil edəcək və Şamaxı ilə Quba arasındakı məsafəni 150 kilometrdən çox (indi bu ara 261 kilometrə bərabərdir) azaltmağa imkan verəcək. Yeni avtomobil yolunun çəkilməsi layihəsi çərçivəsində, ümumi uzunluğu təxminən 3,7 min metr olan 24 körpünün tikintisi planlaşdırılır. Uzunluqları 3,6 km təşkil edəcək 3 tunelin tikintisi də nəzərdə tutulur.
Azərbaycanın Nəqliyyat Nazirliyi və Pyunghwa Engineering Consultants Ltd arasında 2008 - ci il mayın 19 - da imzalanmış Anlaşma Memorandumuna əsasən, şirkət layihənin texniki - iqtisadi əsaslandırmasını, işçi layihəni hazırlamalı və tikinti işlərini aparmalıdır.
Müəlliflə əlaqə saxlamaq üçün elektron ünvan: [email protected]