Azərbaycan, Bakı, 08 yanvar/ Trend , müxbir E.İsmayılov/ Cənubi Koreyanın SK C&C Konsorsiumu Azərbaycanda "Nəqliyyatın intellektual idarə edilməsi sistemi"nin layihələndirmə işlərini başa çatdırıb, - respublikanın Nəqliyyat Nazirliyindən cümə axşamı bildiriblər.
"Layihələndirmə işləri artıq başa çatdırılıb, hazırda sənədlərin Azərbaycan dilinə tərcüməsi həyata keçirilir", - idarədən bildiriblər.
Nazirlikdən qeyd etdikləri kimi, layihənin realizəsinin dəyəri hələ razılaşdırılmayıb. "Layihənin ilkin dəyəri 76 mln. dollar təşkil edir. Vergilər nəzərə alınmadan bu məbləğ 62-63 mln. dollar təşkil edir", - Azərbaycanın nəqliyyat nazirinin müavini Musa Pənahov əvvəllər deyib.
Martda Bakıda Nəqliyyatın İntellektual İdarəetməsi Mərkəzinin tikintisinin başlayacağı gözləilir, - nazirlikdən bildiriblər.
Artıq Mərkəzinin binasının tikiləcəyi yer müəyyənləşdirilib - o Heydər Əliyev prospektində, keçmiş Keşlə Maşınqayırma Zavodunun ərazisində yerləşəcək. Bundan başqa, binanın ilkin dizaynı da hazırdır - onun daxili quruluşu burada layihənin realizəsi üçün lazım olan bütün müasir avadanlığı yerləşdirməyə imkan verəcək, - Pənahov əvvəllər deyib.
Layihənin realizəsinin vacibliyi ondan ibarətdir ki, bu sistem sərnişinlərə öz vaxtlarından daha səmərəli istifadə etməyə və nəqliyyatda vaxt itkisini daha da azaltmağa, hərəkəti nizama salmağa, nəqliyyat sistemində gərginliyi boşaltmağa imkan verəcək.
Nəqliyyat Nazirliyi ilə imzalanan sazişə əsasən, Bakıda Seul Şəhər Nəqliyyatı Mərkəzinə analoq olan Nəzarət Mərkəzi (dispetçerizasiya) yaradılacaq.
SK C&C artıq öz nümayəndəliyini Azərbaycanda qeydiyyatdan keçirib. Hazırda şirkət layihənin ətraflı layihələndirilməsini hazırlayır. Birinci mərhələdə Mərkəz Bakını, perspektivdə isə, Abşeron yarımadasını əhatə edəcək. Ətraflardakı qovşaq nöqtələrində fibriooptik kommunikasiya sistemləri çıxışları hesabına, mərkəzin təsiri Abşeron, Xırdalan, Sumqayıt, Gəncəyə genişləndiriləcək. O, həmçinin, şəhərətrafı və şəhərlərarası daşınmalarla əlaqədə olacaq ki, bu da elektron biletlər sisteminə keçməyə imkan verəcək.
Araşdırmalara əsasən, belə sistemin tətbiqi nəticəsində, işıqfor və avtobus dayanacaqlarının sayı nizamlanacaq. Körpü və piyada keçidlərinin tikintisi nəticəsində onların sayı onsuz da azalıb. Bu sistemin yaradılması avtonəqliyyat vasitələrinin hərəkəti, sürəti, dayanacaqlar, nəqliyyat qəzaları, tıxaclar və digər hallarda mərkəzi dispetçer məntəqəsinə operativ məlumat göndərməyə imkan verəcək.
Nəqliyyatın intellektual idarəsi sisteminin iki mərhələdə 3,5 il ərzində yaradılması nəzərdə tutulur.
Müəlliflə əlaqə saxlamaq üçün elektron ünvan: [email protected]