Azərbaycan, Bakı, 14 yanvar/ Trend , müxbir Ü.İsmayılova/ Azərbaycanda yalnız həyat sığortası ilə məşğul olan ilk sığorta şirkəti yaradılıb. O, "Atesgah Sigorta" şirkətinin bütün Life sığorta (təkrar sığorta) risklərinin "Kavkaz Sigorta" şirkətinə verilməsi nəticəsində təşkil olunub. "Kavkaz Sigorta" da öz növbəsində bütün Non-Life risklərini (ümumi sığorta) "Atesgah Sigorta"ya ötürüb.
Hər iki şirkət "ISR Holding"in tərkibinə daxildir.
Ayrıca Life şirkətlərin yaradılması 2008-ci il martın 15-də qəbul olunan "Sığorta fəaliyyəti haqqında" Qanunda nəzərdə tutulub.
İri sığorta şirkətlərindən biri olan "Atesgah" səhmdarlarının 2008-ci ilin fevral ayında keçirilən ümumi toplantısında təsisçilərin heyətinin dəyişdirilməsi barədə qərar qəbul olunub. Şirkətin yeni səhmdarı "Kapital" Sığorta Qrupuna daxil olan "Norcross" şirkətindən səhmlərin 49 faizini alan I.S.R. Holding Ltd. şirkəti olub. Səhmlərin qalan 30 faizi SOCAR, 21 faizi isə RAN-Eksim şirkətlərinə məxsusdur.
2008-ci ilin yayında I.S.R. Holding Ltd. digər sığorta şirkəti "Kavkaz Sigorta"nı alıb.
"Kavkaz Sigorta" 2007-ci ildə "Qafqaz Sigorta" və New London Insurance LTD-nin bazasında yaradılıb. Nizamnamə kapitalı 1 milyon manat təşkil edir.
"ISR Holding" 1995-ci ildə yaradılıb. Holdinqin əsas fəaliyyət istiqamətləri biznes-mərkəzlər, mehmanxanalar və yaşayış komplekslərinin tikintisi, neft məhsulları ticarəti və onların daşınması, yod hasilatı və istehsalından ibarətdir.
Məqalə müəllifi ilə əlaqə ünvanı - [email protected]